„მამობა უნდა ჩამოერთვას“ - ანასტასია შატალოვას ოჯახი ბავშვის მეურვეობისთვის იბრძოლებს

თბილისი, 23 ოქტომბერი – Sputnik. თბილისში მოკლული ანასტასია შატალოვას ოჯახი ბავშვზე მეურვეობისთვის ბრძოლას იწყებს, იუწყება ტელეკომპანია „რუსთავი 2“.

გუშინ მეურვეობის მულტიფუნქციური საბჭოს გადაწყვეტილებით მოკლული ანასტასია შატალოვას მცირეწლოვანი შვილი მამის, ბათუმის ყოფილი ვიცე-მერის ზურაბ ბერიძის მეურვეობაში გადავიდა.

მოკლულის მამა, სერგეი შატალოვი აცხადებს, რომ ბერიძე მოძალადეა და მას მამობის უფლება არ უნდა ქონდეს.

მისივე განცხადებით, ბოლომდე იბრძოლებს შვილიშვილის მეურვეობის მოსაპოვებლად, თუმცა ბავშვის ქვეყნიდან წაყვანას არ აპირებს და ზურაბ ბერიძეს მისი ნახვის საშუალება ექნება.

რუსეთის მოქალაქე ანასტასია შატალოვა 17–18 ოქტომბრის ღამეს, დაახლოებით 00:30 საათზე საბურთალოს რაიონში ცეცხლსასროლი იარაღით მოკლეს. დანაშაული იმ სახლის სადარბაზოსთან მოხდა, სადაც ქალი ბინას ქირაობდა. რამდენიმე საათში საქმეზე დააკავეს ორი პირი, ერთი – მკვლელობის ბრალდებით, მეორე – დანაშაულში თანამონაწილეობისთვის. მოგვიანებით პოლიციამ კიდევ ერთი ადამიანი დანაშაულის შეუტყობინებლობისთვის დააკავა.

შატალოვას შესახებ საზოგადოებაში ცნობილი გახდა მის მიერ სხვადასხვა მედიასაშუალებებისთვის მიცემული ინტერვიუების შემდეგ, რომელშიც ქალი ბათუმის ვიცე-მერ ზურაბ ბერიძესთან კონფლიქტზე საუბრობდა, რომელთანაც საერთო შვილი ჰყავდა.

ანასტასია შატალოვას მკვლელობის შემდეგ მალევე პოლიციამ ზურაბ ბერიძის სახლიც გაჩხრიკა, რომელთანაც გარდაცვლილს საერთო შვილის გამო კონფლიქტი ხშირად ჰქონდა. ახალგაზრდა ქალის მკვლელობის საქმეში ბერიძე ფიგურირებს თუ არა, შსს-ში ამის თაობაზე განცხადება არ გაკეთებულა.

ამასთან, ბავშვის მეურვეობის საკითხზე სასამართლო დავა ანასტასია შატალოვას და ზურაბ ბერიძეს ადრეც ჰქონდათ. გავრცელებული ინფორმაციით, ბათუმის ყოფილ ვიცე-მერს ბავშვი წაყვანილი ჰყავდა და ქალისთვის დედობის უფლების ჩამორთმევას ითხოვდა, თუმცა მოგვიანებით საქმე მორიგებით დასრულდა და დედას შვილი დაუბრუნეს.