თბილისი, 3 ოქტომბერი — Sputnik. საქართველოს ყოფილი პრეზიდენტის მიხეილ სააკაშვილის მხარდამჭერები ორშაბათს, 4 ოქტომბერს რუსთავის №12 ციხესთან მის მხარდასაჭერად საპროტესტო აქციის გამართვას გეგმავენ.
საქართველოს მესამე პრეზიდენტი მიხეილ სააკაშვილი, რომელმაც საზღვარი არალეგალურად გადმოკვეთა, თბილისში 1 ოქტომბერს დააკავეს.
როგორც თავის Facebook-გვერდზე პარტია „ერთიანი ნაციონალური მოძრაობის“ თავმჯდომარემ ნიკა მელიამ დაწერა, ის თავის მომხრეებს პენიტენციურ დაწესებულებასთან 15:00 საათზე ელოდება.
მოგვიანებით კიდევ ერთი აქციის შესახებ განაცხადეს მოძრაობის „საქართველოსთვის“ აქტივისტებმა. ისინი რუსთავის ციხესთან თავის მომხრეებს რეგიონებიდან 18:00 საათზე ელოდებიან.
„ხვალ 18:00 საათზე ვიკრიბებით რუსთავის ციხესთან, მთელი საქართველოდან დავიძვრებით საკუთარი ავტომობილებით, 11:00 ქობულეთიდან, 12:00 გურიიდან, 14:00 ქუთაისიდან და სხვადასხვა ქალაქებიდან“, – აცხადებენ აქციის ორგანიზატორები.
ექს-პრეზიდენტის გათავისუფლების მოთხოვნით საპროტესტო აქცია კვირას, საღამოსაც გაიმართა. წვიმისა და ქარის მიუხედავად, მონაწილეები ციხის კედლებთან დროშებით რამდენიმე საათის განმავლობაში იდგნენ.
მიხეილ სააკაშვილს, რომელიც 2015 წელს უკრაინის მოქალაქე გახდა, საქართველოში სისხლის სამართლის რიგ საქმეებზე აქვს ბრალი წაყენებული, აქედან ორ საქმეზე განაჩენი დაუსწრებლად გამოუტანეს, დანარჩენები კი სასამართლო წარმოებაშია.
უახლოეს მომავალში მას წაუყენებენ კიდევ ერთ ბრალდებას – საზღვრის უკანონო კვეთის გამო.
საქართველოს პროკურატურაში აცხადებენ, რომ სააკაშვილის უკრაინაში ექსტრადიციის საკითხი არ განიხილება და მას სასჯელის მოხდა სამშობლოში მოუწევს.