თბილისი, 4 ოქტომბერი - Sputnik. ყოფილი პრემიერ-მინისტრ გიორგი გახარიას და მისი პარტიის მომხრეები ადგილობრივი თვითმმართველობის არჩევნების მეორე ტურში მხარს არც „ქართული ოცნების“ და არც მისი მთავარი ოპონენტის „ნაციონალური მოძრაობის “ კანდიდატებს არ დაუჭერენ, განაცხადა პარტიის „საქართველოსთვის" ლიდერმა გიორგი გახარიამ.
ცესკოს წინაწარი მონაცემებით, ადგილობრივი თვითმმართველობის არჩევნებზე ქვეყნის მასშტაბით გახარიას პარტიამ „საქართველოსთვის“ 109 მანდატი აიღო.
„ჩვენი ამომრჩეველი არის გონიერი ამომრჩეველი, რომელმაც იმ ნაბიჯით, რომ ჩვენ დაგვიჭირა მხარი, ფაქტობრივად თქვა, რომ ის წინააღმდეგია რადიკალიზაციის, ძალაუფლების კონცენტრაციის და არის მომხრე ძალაუფლების დაბალანსების. შესაბამისად, ჩვენ მათ ვერ ვეტყვით, და არ ვეტყვით, არ მივაყენებთ შეურაცხყოფას, რომ ვუთხრათ, რომელიმე მათგანს დაუჭირონ მხარი“, – აღნიშნა გიორგი გახარიამ.
გიორგი გახარიამ სრული მხარდაჭერა გამოუცხადა პარტიის მერობის კანდიდატს ბესარიონ ბენდელიანს, რომელიც ცაგერში მეორე ტურში გავიდა.
„ხაზგასმით მინდა აღვნიშნო, რომ თითოეულ მაჟორიტარს, რომელიც წარდგენილია ჩვენი პარტიიდან მეორე ტურებში, ჩვენ მათ მხარს დავუჭერთ და დარწმუნებული ვარ, რომ გავიმარჯვებთ“, - განაცხადა გახარიამ.
გახარიამ ასევე აღნიშნა, რომ ამ მუნიციპალური არჩევნების შემდეგ მისი პარტია შეეცდება არც ერთ შემთხვევაში არ დაუშვას ერთპიროვნული მმართველობა. რადგან ამ ორ, მისი თქმით, „ვითომ“ ერთმანეთთან დაპირისპირებულ პოლიტიკურ ძალას -„ქართულ ოცნებასაც“ და „ნაციონალურ მოძრაობასაც“ ორივეს აქვს მიდრეკილება ერთპიროვნული მმართველობისკენ.
„ჩვენი მთავარი მიზანი იქნება დაბალანსება და ის, რომ არ მივცეთ შესაძლებლობა არც ერთ მათგანს მოახდინონ ძალაუფლების კონცენტრაცია სადმე, მათ შორის მუნიციპალურ დონეზე“, - განაცხადა გიორგი გახარიამ.
საქართველოში 2 ოქტომბერს თვითმმართველობის არჩევნები ჩატარდა. ქვეყნის მოსახლეობამ 64 მუნიციპალიტეტის საკრებულოს დეპუტატობისა და მერობის კანდიდატებს მისცა ხმა.
ცესკოს წინასწარი მონაცემებით, საქართველოს 20 ქალაქში, მათ შორის თბილისში სადაც ამომრჩეველთა 50%–ზე მეტი ხმის მოპოვება ვერც ერთმა კანდიდატმა ვერ შეძლო მეორე ტური გაიმართება.
საქართველოში ადგილობრივი თვითმმართველობის არჩევნების მეორე ტური 30 ოქტომბერს გაიმართება, რომლისთვისაც მმართველი პარტია „ქართული ოცნება“ და მისი მთავარი კონკურენტი, ყველაზე მსხვილი ოპოზიციური პარტია „ერთიანი ნაციონალური მოძრაობა“ ემზადება.
ცესკოს მონაცემებით, მმართველო პარტიის თბილისის მერობის კანდიდატმა კახა კალაძემ ხმების 44,97%, ხოლო მისმა მთავარმა კონკურენტმა „ერთიანი ნაციონალური მოძრაობიდან“ ნიკა მელიამ კი 33,98% მოიპოვა.