თბილისი, 28 სექტემბერი — Sputnik. ქართველი სკულპტორისა და ილუსტრატორის თეა ჯორჯაძის გამოფენა All Building As Making ბერლინის გროპიუს-ბაუს (Gropius-Bau) მუზეუმში გაიხსნა და მომავალი წლის 22 იანვრამდე გაგრძელდება.
ჯორჯაძე პირველ სოლო-გამოფენაზე იმ ქალაქში, სადაც ის ცხოვრობს და მუშაობს, წარმოადგენს ინსტალაციების ახალ სერიებსა და სკულპტურულ ნამუშევრებს.
პროექტი წარმოდგენილია გამოყენებითი ხელოვნების საშუალებით, აგებული ვიზუალური ჩვენების ტექნიკით – ვიტრინებით და სვეტებით. თაბაშირი, ლითონი, ქაფი, ტექსტილი, ხე და პაპიე-მაშე – თეა ჯორჯაძის ნამუშევრები ერთდროულად გამორჩეულია მასალათა დახვეწილი შეხამებით.
„თეა ჯორჯაძის შემოქმედება აჩვენებს, თუ როგორ ხდება ისტორიისა და ინსტიტუციური მეხსიერების კომუნიკაცია ყოველდღიური მასალების, საგნებისა და მეთოდების წარმოჩენით. ჯორჯაძის გამოფენით ჩვენ შეგვიძლია განვსაზღვროთ ბერლინის ერთ-ერთი გამორჩეული ხელოვანის მნიშვნელოვანი წვლილი მსოფლიო ხელოვნებაში“, – განაცხადა Gropius-Bau-ს დირექტორმა სტეფანი როზენტალმა.
თეა ჯორჯაძის ნამუშევრები ბერლინის მუზეუმის იმ ისტორიულ ნაწილშია წარმოდგენილი, სადაც ერთ დროს ჰაინრიხ შლიმანის მიერ აღმოჩენილი არტეფაქტები იყო გამოფენილი.