თბილისი, 27 სექტემბერი – Sputnik. არასტანდარტული ვაშლის შემსყიდველ საწარმოებზე საბრუნავი საშუალებებისთვის „შეღავათიანი აგროკრედიტის” პროექტის ფარგლებში გასაცემი კრედიტის მოცულობა 500 ათასი ლარიდან 5 მილიონამდე ლარის ჩათვლით განისაზღვრა.
გადაწყვეტილება „შეღავათიანი აგროკრედიტის” პროექტში ცვლილებების განხორცილების თაობაზე დღეს მთავრობის სხდომაზე მიიღეს.
სესხის აღებას არასტანდარტული ვაშლის რეალიზაციის ხელშეწყობის საკოორდინაციო შტაბში რეგისტრირებული ხილის გადამამუშავებელი კომპანიები არასტანდარტული ვაშლის შეძენისა და მისი გადამუშავების მიზნობრიობით შეძლებენ.
მიმდინარე წელს არასტანდარტული ვაშლის მოსავლის რეალიზაციის ხელშეწყობის პროგრამაში ხილის გადამამუშავებელი რვა საწარმოა ჩართული შიდა ქართლის, კახეთის, მცხეთა-მთიანეთისა და რაჭა-ლეჩხუმის რეგიონებიდან. არასტანდარტული ვაშლის გადამუშავებით მიღებული კონცენტრატის რეალიზაცია მეტწილად ევროკავშირის ბაზარზე ხორციელდება.
სამრეწველო ვაშლის დაბინავების პროცესის შეუფერხებლად განხორციელების მიზნით სახელმწიფო სუბსიდიის პროგრამას ახორციელებს. პროგრამის ფარგლებში სამრეწველო ვაშლის შესყიდვისას სახელმწიფო სუბსიდიას გასცემს – 1 კგ არასტანდარტულ ვაშლზე 10 თეთრს. სუბსიდიას ვაშლის მოსავლის რეალიზაციის საკოორდინაციო შტაბში რეგისტრირებული ხილის გადამამუშავებელი ის კომპანიები მიიღებენ, რომლებიც მეხილეობის სფეროში დასაქმებული ფიზიკური პირებისგან 1 კგ არასტანდარტულ ვაშლს არანაკლებ 22 თეთრად შეისყიდიან.
26 სექტემბრის მონაცემებით, უკვე გადამუშავებულია 3.700 ტონაზე მეტი სამრეწველო ვაშლი.
„შეღავათიანი აგროკრედიტის“ სახელმწიფო პროექტი 2013 წლიდან ხორციელდება. პროგრამა ფერმერების დასახმარებლად მიზნობრივ კრედიტებს ითვალისწინებს დაბალი ტარიფით.