თბილისი, 21 სექტემბერი – Sputnik. ბათუმის მოსახლეობის ნაწილი საპროტესტო აქციაზე გამოვიდა – ისინი დაანონსებული „პალმის კუნძულის“ მსგავსი პროექტის მშენებლობის წინააღმდეგი არიან, იუწყება „Sputnik–საქართველოს“ კორესპონდენტი ადგილიდან.
დუბაის მსგავსი „პალმის კუნძულის“ პროექტი ამ დღეებში აჭარის მთავრობის მეთაურმა თორნიკე რიჟვაძემ დააანონსა.
აქციის მონაწილეებმა აჭარის მთავრობის შენობასთან საჰაერო ბურთები და პალმის რტოები მიიტანეს.
მათი თქმით, როდესაც რეგიონში ყოველდღიურად მატულობს უფასო სასადილოებში შემსვლელები, ბათუმის მერიას არ შეუძლია უკანონო მშენებლობებთან გამკლავება, ხოლო ქალაქის მოსახლეობა წვიმის შემდეგ ნორმალურად ვერ გადაადგილდება, „პალმის კუნძულის“ მშენებლობაზე ლაპარაკი უბრალოდ დაცინვა და ირონიაა.
„ეს წინასაარჩევნო სპექტაკლია“, – განაცხადა პარტიის „ლელო საქართველოსთვის“ კანდიდატმა ბათუმის საკრებულოში ალექსანდრე ფიფიამ.
თორნიკე რიჟვაძის განცხადებით, მთავრობა ინვესტორებს მოიზიდავს. პროექტის განხორციელებაზე რამდენიმე ათეული მილიონი დოლარი დაიხარჯება.
აჭარის მთავრობის მეთაურის ინფორმაციით, პროექტზე დიზაინერთა და არქიტექტორთა საერთაშორისო ჯგუფი იმუშავებს. ეს პროექტი რეგიონში მოიზიდავს ტურისტებს, ასევე შექმნის სამუშაო ადგილებს.
„პალმის კუნძულები“ ხელოვნური კუნძულების არქიპელაგია, რომელიც არაბთა გაერთიანებულ საამიროებში მდებარეობს. არქიპელაგის შემადგენლობაში სამი დიდი კუნძული შედის, რომლებსაც პალმის ფორმა აქვს. ტურისტები მას „მერვე საოცრებას“ უწოდებენ.