თბილისი, 3 სექტემბერი – Sputnik. დღეს საქართველო სრულად ვაქცინირებული ქვეყანა რომ იყოს, დღეში არა 70-80, არამედ 5-6 გარდაცვლილი გვეყოლებოდა, განაცხადა თბილისის ინფექციური საავადმყოფოს დირექტორმა თენგიზ ცერცვაძემ ტელეკომპანია Imedi-ს ეთერში.
საქართველოში გასულ დღე-ღამეში კორონავირუსს 86 ადამიანი ემსხვერპლა – ეს ეპიდემიის დაწყებიდან ყველაზე მაღალი დღიური მაჩვენებელია. გარდაცვლილთა საერთო რიცხვმა კი 7.600-ს გადააჭარბა.
ცერცვაძის განცხადებით, ვაქცინაცია მნიშვნელოვნად ამცირებს მძიმე შემთხვევების, ჰოსპიტალიზაციისა და სიკვდილიანობის მაჩვენებელს.
„ის, რომ ვაქცინაცია მნიშვნელოვნად ამცირებს მძიმე შემთხვევების რაოდენობას, ჰოსპიტალიზაციასა და რეანიმაციაში პაციენტის მოხვედრის საჭიროებას და, რაც მთავარია, დაახლოებით 80-90%-ით ამცირებს სიკვდილიანობას, ეს დადასტურებულია და განსჯას არ ექვემდებარება“, – განაცხადა თენგიზ ცერცვაძემ.
ინფექციური საავადმყოფოს დირექტორმა მოსახლეობას კიდევ ერთხელ მოუწოდა ვაქცინაციის პროცესში აქტიური ჩართვისკენ, პირბადის ტარებისა და სოციალური დისტანციის დაცვისკენ.
საქართველო კორონავირუსის მეოთხე ტალღას ებრძვის. ინფიცირების დღიური მაჩვენებელი 2-დან 5 ათასამდე მერყეობს. გაზრდილია ლეტალობის მაჩვენებელიც – მხოლოდ აგვისტოში საქართველოში 1.588 ინფიცირებული გარდაიცვალა.
სპეციალისტების შეფასებით, მეოთხე ტალღა ყველაზე აგრესიულია და ეს კორონავირუსის „ინდური შტამის“ გავრცელებას უკავშირდება.
საქართველოში მასობრივი ვაქცინაცია 5 ივლისს დაიწყო, მას შემდეგ, რაც ქვეყანამ ჩინური წარმოების Sinopharm-ის და Sinovac-ის ვაქცინების მილიონი დოზა მიიღო. ამ დროისათვის ქვეყანაში პრეპარატ Pfizer-ით 16 წლიდან პირთა ვაქცინაცია მიმდინარეობს. რაც შეეხება 18 წლის და ზემოთ ასაკის პირებს, მათ არჩევნის გაკეთება ამ ეტაპზე შეუძლიათ პრეპარატ Pfizer-სა და Sinovac-ს შორის, ხოლო 45 წელს ზემოთ პირებს დამატებით AstraZeneca-ს არჩევაც შეუძლიათ.
ამ დროისათვის ქვეყანაში ჩატარებულია1.259.391 აცრა. აქედან ერთი დოზით აცრილია 822.297 ადამიანი – ზრდასრული მოსახლეობის 28,8%, ხოლო სრულად (ორჯერადად) ვაქცინირებულია 437.094 ადამიანი – ზრდასრული მოსახლეობის 15,3%.