თბილისი, 29 ივლისი — Sputnik. ბრიტანეთის საზოგადოებრივი ჯანდაცვის სამსახურის (PHE) განცხადებით, ახლა კორონავირუსით ინფიცირების ყოველი ათი შემთხვევიდან ცხრა „დელტა“ ვარიანტს განეკუთვნება, წერს გამოცემა Express-ი.
PHE-ს მონაცემებით, „დელტას“, რომელიც უფრო გადამდებია, ვიდრე მანამდე დომინანტი „ალფა“ შტამი იყო, COVID-19-ის კლასიკური ნიშნების გარდა, სხვა სომპტომებიც ახასიათებს.
როგორც პროფესორი ტიმ სპექტორი ამბობს, „დელტათი“ ინფიცირების შემთხვევაში ადამიანს კორონავირუსისთვის დამახასიათებელი კლასიკური ნიშნები — სხეულის მაღალი ტემპერატურა, ხველება, ყნოსვისა თუ გემოს დაკარგვა შეიძლება არც აღენიშნებოდეს.
„ახალი შტამი, როგორც ჩანს, ცოტა სხვაგვარად მუშაობს. ადამიანს შეიძლება მოეჩვენოს, რომ სეზონური გრიპის რომელიმე სახესხვაობა აქვს“, — ამბობს ის.
გარდა ამისა, ექიმების განმარტებით, „დელტა“ ზოგ შემთხვევაში შესაძლოა კუჭ-ნაწლავის სისტემის აშლილობითაც გამოვლინდეს — მუცლის ტკივილის, პირღებინებისა და ფაღარათის სახით.
მანამდე აშშ-ის დაავადებათა კონტროლისა და პროფილაქტიკის ცენტრების (CDC) ხელმძღვანელმა როშელ ვალენსკიმ განაცხადა, რომ კორონავირუსზე სრულად ვაქცინირებული ადამიანები იშვიათ შემთხვევებში შეიძლება „დელტა“ შტამის გადამდები მაინც იყვნენ. როგორც CDC-ს ხელმძღვანელმა აღნიშნა, ახალი მონაცემები აჩვენებს, რომ „დელტა“ ვარიანტი თავისი წინამორბედი შტამებისგან „სრულიად განსხვავებულად“ იქცევა.