თბილისი, 9 თებერვალი – Sputnik. ყველა სკოლაში, დაწყებული მე-5 კლასიდან და ზემოთ, მოსაწავლეებისთვის აუცილებელი იქნება პირბადის ტარება. ამის შესახებ განათლების მინისტრმა მიხეილ ჩხენკელმა ბრიფინგზე განაცხადა.
რეკომენდაციები და სავალდებულოდ შესასრულებელი წესები, რომლებიც სკოლებმა უნდა დაიცვან>>
უწყებათშორისი საკოორდინაციო საბჭოს გადაწყვეტილებით, 15 თებერვლიდან თბილისში, ქუთაისსა და რუსთავში სასწავლო პროცესი საკლასო ოთახებში განახლდება. მთავრობაში განმარტავენ, რომ პანდემიის გამო დაწესებული შეზღუდვების ვადაზე ადრე შემსუბუქება ქვეყანაში კოვიდ-ინფექციის გავრცელების კლებამ გამოიწვია.
მინისტრის განცხადებით, დეტალური ინსტრუქციები სკოლებს დღესვე დაურიგდება.
„ეს დაიწყება უკვე ხვალიდან, და ყველაფერი კეთდება იმისთვის, რომ შევინარჩუნოთ ის კარგი დინამიკა, რომელიც უკვე გვაქვს“, – განაცხადა ჩხენკელმა.
1 თებერვლიდან აჭარის, ზუგდიდის, გორის, ფოთისა და თელავის სკოლებში სასწავლო პროცესი აღდგა. რაც შეეხება თბილისის, რუსთავისა და ქუთაისის სკოლებს, მთავრობის მიერ შემუშავებული გეგმის მიხედვით, აღნიშნულ ქალაქებში სასწავლო პროცესის აღდგენა 1 მარტიდან იყო დაგეგმილი, თუმცა სასწავლო პროცესი ორი კვირით ადრე, 15 თებერვლას განახლდება.