თბილისი, 4 ნოემბერი – Sputnik. წლიურმა ინფლაციამ საქართველოში 3,8% შეადგინა 3%-იანი მიზნობრივი მაჩვენებლის პირობებში, იუწყება საქართველოს სტატისტიკის ეროვნული სამსახური „საქსტატი“.
ოქტომბერში, სექტემბერთან შედარებით, ინფლაციის დონემ 0,8% შეადგინა. სექტემბერში ინფლაციის თვის მაჩვენებელი 0,7% იყო.
„საქსტატის“ მონაცემებით, ოქტომბერში ყველაზე მეტად ფასები შემცირდა სასტუმროებსა და რესტორნებზე 0,04%-ით, საყოფაცხოვრებო–კომუნალურ სფეროში – 0,01%-ით. ამავე დროს, გაძვირდა კვების პროდუქტები – 0,28%-ით, ტანსაცმელი და ფეხსაცმელი – 0,18%-ით, ასევე ჯანდაცვა – 0,09%-ით.
როგორ იცვლებოდა ინფლაცია წლის დასაწყისიდან
2019 წელს წლიურმა ინფლაციამ 7% შეადგინა. მის შესაკავებლად ეროვნულმა ბანკმა 2019 წლის სექტემბრიდან მონეტარული პოლიტიკის გამკაცრება დაიწყო. რეფინანსირების განაკვეთი ამ პერიოდში 6,5%-დან 9%-მდე გაიზარდა, ბოლოს მან 2019 წლის დეკემბერში მოიმატა.
წლის დასაწყისიდან ინფლაციის წლიურმა დონემ კლება დაიწყო – იანვარსა და თებერვალში მან 6,4% შეადგინა, მარტში – 6,1%. საქართველოში კორონავირუსის გავრცელების თავიდან აცილების მიზნით ქვეყნის ხელისუფლებამ 21 მარტს კარანტინი და კომენდანტის საათი დააწესა. ეკონომიკური აქტივობის წასახალისებლად ეროვნულმა ბანკმა აპრილიდან სამ ეტაპად 8%-მდე შეამცირა მონეტარული პოლიტიკის ძირითადი განაკვეთი.
ამის მიუხედავად, ოქტომბერში, გასული წლის ანალოგიურ პერიოდთან შედარებით, სურსათის ფასმა 1,74%-ით მოიმატა: ხილი გაძვირდა 3,2%-ით, რძე, ყველი და კვერცხი – 6%-ით, ხორცი – 3,5%-ით, პურპროდუქტები – 7,8%-ით. კორონავირუსის პანდემიის გამო შექმნილი ვითარების გათვალისწინებით, გაიზარდა ჯანდაცვის მომსახურების ფასებიც 9%-ით.
როგორ შეიცვლება ინფლაცია
საქართველოს ეროვნული ბანკი მიიჩნევს, რომ ბოლო თვეების ინფლაციის დინამიკა რეგულატორის პროგნოზებს შეესაბამება.
„წლიური ინფლაცია შემცირებას განაგრძობს და მან სექტემბერში 3,8 პროცენტი შეადგინა. არსებული პროგნოზით, სხვა თანაბარ პირობებში, წლიური ინფლაციის შემცირების ტენდენცია გაგრძელდება და ის 2021 წელს მიზნობრივ ინფლაციასთან (3%) ახლოს იქნება“, – ნათქვამია ეროვნული ბანკის განცხადებაში.
დოკუმენტში აღნიშნულია, რომ ინფლაციის შემცირების დინამიკას სუსტი ერთობლივი მოთხოვნა განაპირობებს და მოსალოდნელია, რომ აღნიშნული მდგომარეობა მომავალ პერიოდებშიც შენარჩუნდება. გარდა ამისა, საყურადღებოა ასევე საგარეო მოთხოვნის შემცირება.