თბილისი, 28 აპრილი – Sputnik. ბოლო 24 საათში საქართველოში კორონავირუსი კიდევ 15 პაციენტს დაუდგინდა. უმრავლეს შემთხვევაში მათი ინფიცირების წყარო ცნობილია – ბოლნისი, მარნეული, თეთრიწყარო. ამის შესახებ ბრიფინგზე თბილისის ინფექციური საავადმყოფოს სამედიცინო დირექტორმა მარინა ეზუგბაიამ განაცხადა.
მისი თქმით, ჯერ კიდევ დგინდება ორი ინფიცირებულის კლასტერი.
ეზუგბაიას განცხადებით, ინფექციურ საავადმყოფოში მკურნალობას განაგრძობს 43 პაციენტი. ოთხი გამოჯანმრთელდა და გაეწერა.
„43 პაციენტიდან მძიმე პაციენტების სიაში მხოლოდ ხუთი პაციენტი გვყავს... დანარჩენი პაციენტები განიხილება, როგორც საშუალო და მსუბუქი. გვყავს 11 მოზარდი, მათი მდგომარეობაც დამაკმაყოფილებელია, უბრალოდ, დაავადების ხანგრძლივობიდან გამომდინარე, მათთან ჯერ ადრეა გამოჯანმრთელების ტესტირების ჩატარება და, ალბათ, რამდენიმე დღეში მათთანაც დავიწყებთ“, – განაცხადა ეზუგბაიამ.
მისი თქმით, 28 აპრილისთვის ქვეყნის ყველა კლინიკაში კორონავირუსზე 349 პაციენტი მკურნალობს.
შვიდი ახალი პაციენტი ბოჭორიშვილის სახელობის კლინიკაში მკურნალობს, სადაც ინფიცირებულთა რაოდენობა 54-მდე გაიზარდა. ამის შესახებ ჟურნალისტებს კლინიკის სამეთვალყურეო საბჭოს თავმჯდომარემ მაკა სოლოღაშვილმა განუცხადა.
შვიდივე ახალი პაციენტი ბოლნისისა და შინდისის კლასტერებს განეკუთვნება.
„დაემატა შვიდი პაციენტი, აქედან ოთხი არის გადმოყვანილი ბოლნისიდან და შინდისიდან, სამი პაციენტის დიაგნოზი კი დადასტურდა ჩვენს კლინიკაში. გუშინ ორი გამოჯანმრთელდა და გაეწერა. 18 წლამდე ასაკის პირი არის 11. ერთი პაციენტი არის მძიმე და მკურნალობს რეანიმაციულ განყოფილებაში. 11 პაციენტი არის საყურადღებო, აქედან სამი არის ასაკობრივი, მაღალი რისკის ჯგუფით. ბავშვების მდგომარეობა დამაკმაყოფილებელია“, – განაცხდა სოლოღაშვილმა.
გამყრელიძე – კარანტინის დატოვებამდე ტესტირებას ყველა გაივლის>>
28 აპრილისთვის საქართველოში კორონავირუსით ინფიცირებულთა რაოდენობა 511-ია. აქედან გამოჯანმრთელდა 156, გარდაიცვალა 6 პაციენტი.