თბილისი, 11 მარტი — Sputnik. ტელეკომპანია „მთავარი არხის“ ჟურნალისტი ირაკლი ვაჩიბერაძე კარანტინში გადაიყვანეს, ინფორმაციას სოციალურ გვერდზე არხის საინფორმაციო სამსახურის უფროსი ნოდარ მელაძე ავრცელებს.
მისი თქმით, ჟურნალისტს კომუნიკაცია ჰქონდა სოფლის მეურნეობის მინისტრის მოადგილე იური ნოზაძესთან, რომელსაც კორონავირუსი დაუდასტურდა. სიუჟეტი სოფლის მეურნეობის მინისტრის მოადგილის შვილის კორონავირუსით ინფიცირების ფაქტს ეხებოდა.
„თემაზე რატომ მოხდა თბილისიდან პაციენტის გადაყვანა საჩხერის საავადმყოფოში, ამ რეპორტაჟის მომზადების დროს იმყოფებოდა სახლში ინფიცირებულის ოჯახთან. სწორედ ამ დროს გავიგეთ, რომ ეს ოჯახიც იმყოფებოდა თვითიზოლაციაში. (და არა ის, რომ თითქოს თვითიზოლაციაში, მყოფი პირის გადასაღებად მივიდა). გადაღება ხდებოდა ღია სივრცეში, დაცული დისტანციით, თუმცა რეკომენდირებულია საკარანტინე სივრცეში ყოფნა და გადავიდა კარანტინში“, - წერს ნოდარ მელაძე.
საქართველოში კორონავირუსით ინფიცირებულთა რიცხვი 23-მდე გაიზარდა. კარანტინის რეჟიმში ამ დროისთვის 126 ადამიანი იმყოფება, სტაციონარში მეთვალყურეობის ქვეშ კი 46 პაციენტი რჩება.