თბილისი, 20 ივნისი — Sputnik. მუსიკალური ტრიო ლონდონიდან The Tiger Lillies თბილისში 20 სექტემბერს წარდგება, ნათქვამია ღონისძიების Facebook-გვერდზე.
რატომ არ მოეწონა გორის მერს სამეფო უბნის თეატრის სპექტაკლი >>
მუსიკოსები მარჯანიშვილის თეატრის სცენაზე წარადგენენ პროგრამას „მოჯადოებული სასახლე“ ედგარ ალან პოს მიხედვით. ორგანიზატორთა თქმით, საათნახევრიანი შოუ მძაფრსიუჟეტიან ვიზუალურ კოშმარს წააგავს.
ტრიოს შემადგენლობაში არიან: მარტინ ჟაკი, ედრიან სტაუტი და ჟონას გოლანდი. არტისტები მკვეთრი მაკიაჟით და ორიგინალური სცენიური სახეებით გამოირჩევიან.
The Tiger Lillies – ეს არის საოპერო მუსიკის, ბოშური მოტივების და პარიზის სანაპიროს მელოდიების ნაზავი. კოლექტივი 1989 წელს დააარსდა. მუსიკოსები ასრულებენ კომპოზიციებს შავი იუმორის ელემენტებით. მათი სიმღერების გმირები ხშირად ხდებიან მეძავები, ნარკომანები, დამნაშავეები, ფსიქიური გადახრების მქონე ადამიანები.
ტრიო საქართველოში უკვე მეორედ ჩამოდის. 2015 წელს მუსიკოსები თბილისის ფესტივალ Open Air-ზე წარდგნენ.
The Tiger Lillies საქართველოს თბილისის საერთაშორისო თეატრალური ფესტივალის ფარგლებში ეწვევიან. საიუბილეო, რიგით მეათე ფესტივალზე, რომელიც დედაქალაქში 14-30 სექტემბერს ჩატარდება, შეიკრიბებიან თეატრალური დასები გერმანიიდან, დიდი ბრიტანეთიდან, მალაიზიიდან, აშშ-დან, კანადიდან და ჩინეთიდან.
თბილისის საერთაშორისო თეატრალური ფესტივალი დედაქალაქის მერიამ 2009 წელს ქალაქის კულტურის პოპულარიზაციის მიზნით დააარსდა.