თბილისი, 3 აპრილი — Sputnik. თბილისის მერია ღვიძლის ტრანსპლანტაციის საერთო ღირებულებიდან 70 ათას ლარს დააფინანსებს, განაცხადა დედაქალაქის მერმა კახა კალაძემ ქალაქის მთავრობის სხდომაზე.
უფრო ადრე მერია 60 ათასი ლარით აფინანსებდა ამ ოპერაციას, რომლის ღირებულება საორიენტაციოდ 120 ათასი ლარია.
„ჩვენ გვაქვს მზადყოფნა, რომ მხარში დავუდგეთ იმ ადამიანებს, ვისაც ამის აუცილებლობა აქვს, თუმცა ვისურვებდი, რომ არავის არასდროს დასჭირდეს მსგავსი ტიპის ოპერაცია", – განაცხადა კალაძემ.
მერის განცხადებით, ამ პროგრამით სარგებლობა შეუძლიათ საქართველოს მოქალაქეებს, რომლებიც ბოლო წლის განმავლობაში დარეგისტრირდნენ თბილისში.
გასულ წელს ათი ასეთი ოპერაცია დაფინანსდა, აღნიშნა მერმა. ღვიძლის ტრანსპლანტაციის ოპერაციის დაფინანსების პროგრამა კალაძის წინასაარჩევნო დაპირება იყო, რომელსაც ის მერად არჩევის შემდეგ ახორციელებს.
ღვიძლის ტრანსპლანტაცია ბევრად ეფექტური და ძალიან ხშირად ერთადერთი რადიკალური მეთოდია ღვიძლით დაავადებული ადამიანების სამკურნალოდ. დაავადებებს შორისაა ღვიძლის ციროზი, ავთვისებიანი და კეთილთვისებიანი სიმსივნეები. საქართველოს კანონმდებლობით, ორგანოს გადანერგვისას დონორი აუცილებლად პაციენტის ნათესავი უნდა იყოს.
