GWP გამრეკელის ქუჩაზე წყლის მილის დაზიანებით გამოწვეულ ზარალს სრულად აუნაზღაურებს

© press-service of Georgian Water and PowerGWP-ის ტექნიკური სამსახური
GWP-ის ტექნიკური სამსახური - Sputnik საქართველო, 1920, 18.11.2026
გამოწერა
კომპანიის განცხადებით, ადგილობრივ მცხოვრებლებს სასმელი წყლის მიწოდება არ შეწყვეტიათ, რადგან ქსელი ალტერნატიულ მაგისტრალზე დაუყოვნებლივ გადაერთო.
თბილისი, 18 ნოემბერი — Sputnik. საბურთალოს რაიონში, მიცკევიჩისა და გამრეკელის ქუჩების კვეთაზე მაგისტრალური წყალსადენის დაზიანების შედეგად დაზარალებულ ოჯახებს ზარალი სრულად აუნაზღაურდებათ, გაცხადა თბილისის მერმა კახა კალაძემ დედაქალაქის მთავრობის დღევანდელ სხდომაზე.
18 ნოემბერს, გამთენიისას, 03:30 საათზე საბურთალოს რაიონში, მიცკევიჩისა და გამრეკელის ქუჩების კვეთის მიმდებარედ კომპანია „ჯორჯიან უოთერ ენდ ფაუერის“ (GWP) 1 200 მმ-იანი მაგისტრალური წყალსადენი ავარიულად დაზიანდა. მილის დაზიანების ამსახველი ვიდეომასალა სოციალურ ქსელშიც გავრცელდა. მომხდარი შემთხვევის გამო პრობლემები შეექმნათ ადგილობრივ მაცხოვრებლებს, დაზიანდა ავტომობილები. საავტომობილო მოძრაობა დროებით შეიზღუდა გამრეკელის ქუჩაზეც.
„აღნიშნული შემთხვევის გამო, გამრეკელის ქუჩაზე საავტომობილო მოძრაობა შეზღუდულია, რამაც, რა თქმა უნდა, გარკვეული შეფერხებები გამოიწვია მთელი ქალაქის მასშტაბითაც. წყლის მიწოდების პრობლემა ამ ეტაპზე არ არსებობს იმიტომ, რომ ალტერნატიულ მაგისტრალზე იქნა გადართული მოსახლეობა“, – განაცხადა კალაძემ.
მისი განმარტებით, მუნიციპალიტეტს კომპანიასთან მჭიდრო კომუნიკაცია აქვს, ამ ეტაპზე მიყენებული ზარალის შესწავლა მიმდინარეობს და მოქალაქეებს მიყენებული ზარალი სრულად აუნაზღაურდებათ.
„შემთხვევის ადგილზე იმყოფებიან როგორც GWP-ის, ისე საგანგებო სიტუაციების მართვის სამსახურის წარმომადგენელი წარმომადგენლები, ასევე, საბურთალოს გამგეობის თანამშრომლები, რომლებიც აქტიურ კომუნიკაციაში არიან ადგილობრივ მოსახლეობასთან“, – აღნიშნა თბილისის მერმა.
მაგისტრალური წყალსადენის ავარიულად დაზიანებასთან დაკავშირებით დღეს სპეციალური განცხადება გაავრცელა „ჯორჯიან უოთერ ენდ ფაუერმაც“.
კომპანიის მიერ გავრცელებული ინფორმაციით, წყლის ნაკადის შესაჩერებლად ოპერატიულად დაიკეტა დაზიანებული მაგისტრალური მილსადენის ჩამკეტ-მარეგულირებელი ურდულები. მოსახლეობისთვის წყალმომარაგების შეფერხების თავიდან აცილების მიზნით კი კომპანიამ უზრუნველყო აღნიშნულ არეალში მდებარე აბონენტების ალტერნატიულ ქსელზე გადართვა.
ყველა ახალი ამბავი
0