„რთველი 2026" : მთავრობამ ყურძნის შესასყისი ფასი დააკორექტირა
© National Wine Agency of Georgia
გამოწერა
რაც შეეხება იმ მევენახეებს, რომლებმაც მოქმედი ღირებულებით ჩააბარეს ყურძენი, მისი თქმით, ახალი ფასებით მოხდება გადათვლა და დაუკომპენსირდებათ შესაბამისი სხვაობა.
თბილისი, 22 სექტემბერი — Sputnik. საქართველოს მთავრობის გადაწყვეტილებით ჩასაბარებელი ყურძნის ფასში ცვლილება შევიდა, განაცხადა ღვინის ეროვნული სააგენტოს თავმჯდომარემ, „რთველი 2026"-ის შტაბის უფროსმა ლევან მეხუზლამ.
ყვარელსა და გურჯაანში მევენახეები მეორე დღეა ღვინის საწარმოებთან აქციას მართავენ და ყურძნის დღეისთვის მოქმედ ფასს აპროტესტებენ. მათი თქმით, ვენახის მოვლისთვის, შხამქიმიკატების, მუშახელის დაქირავებისა და ტრანსპორტირებისთვის გაწეული ხარჯი ბევრად აღემატება ყურძნის ფასს. აქედან გამომდინარე, მათთვის მიუღებელია ნაკლებშაქრიანი ყურძნის ფასი, რომელიც 1 კგ-ზე 30 თეთრს შეადგენს. მევენახეების თქმით, 1 კგ ყურძნის მინიმალური ფასი ერთი ლარიდან უნდა იწყებოდეს.
„საქართველოს მთავრობასთან და გარემოს დაცვისა და სოფლის მეურნეობის მინისტრ დავით სონღულაშვილთან კონსულტაციის შედეგად, მივიღეთ გადაწყვეტილება რომ ჩასაბარებელი ყურძნის ფასებში შევიტანოთ ცვლილება. ვითვალისწინებთ რა იმ მოცემულობას, რომ წელს იყო უხვი ნალექი და ყურძენს გაუჭირდა შაქრიანობის აღება, კონდიციურობის მიხედვით იქნება ახალი ფასები“, - განაცხადა მეხუზლამ საკოორდინაციო შტაბში გამართულ ბრიფინგზე.
რაც შეეხება იმ მევენახეებს, რომლებმაც მოქმედი ღირებულებით ჩააბარეს ყურძენი, მისი თქმით, ახალი ფასებით მოხდება გადათვლა და დაუკომპენსირდებათ შესაბამისი სხვაობა.
ცვლილელების შედეგად, მაღალკონდიციური „საფერავის" შემთხვევაში, რომლის შაქრიანობა 20%-ზე მეტია, ფასი - 1,5 ლარი იქნება; 19%-ზე მეტი შაქრიანობის „რქაწითელის" და სხვა დანარჩენი ყურძნის შემთხვევაში - 1,3 ლარი; არაკონდიციური „საფერავის" შემთხვევაში, რომლის შაქრიანობა 16%-დან 20%-მდეა - 1 ლარი; 16%-დან 19%-მდე „რქაწითელის" და სხვა დანარჩენი ყურძნის შემთხვევაში - 90 თეთრი.
„16%-მდე არაკონდიციურად ითვლება ყურძენი, რომელიც არც საღვინედ არის ვარგისი და არც სასპირტედ, არის ფაქტიურად მკვახე ყურძენი. სახელმწიფოს პოზიციაა, რომ ქვეყანაში არცერთი კილოგრამი ყურძენი არ დარჩეს ჩაუბარებელი. შესაბამისად, ამ შემთხვევაში ვუშვებთ გამონაკლისს იმისთვის, რომ მევენახემ შეძლოს გაწეული ხარჯების დაფარვა და მისი ღირებულება იქნება 50 თეთრი, ჰიბრიდი - 30 თეთრი“, - აღნიშნა მეხუზლამ.
მანამდე ხელისუფლებამ განაცხადა, 2026 წელს საქართველოში ყურძნის ფასი მის ხარისხზე იქნება დამოკიდებული და სუბსიდირების ნაცვლად, სახელმწიფო ფერმერებისგან ჭარბი მოსავლის შესყიდვის გარანტი გახდება. მიმდინარე წლის რთველის მიმდინარეობისას ყურძნის იმ ნამეტს, რომელსაც კერძო სექტორი არ შეიძენს, სახელმწიფო საწარმო „მოსავლის მართვის კომპანია“ შეისყიდის.
აქამდე დიფერენცირებული ფასები ასეთი იყო:
კონდიციური და დაუზიანებელი „საფერავის", რომლის შაქრიანობა არანაკლებ 21%-ია, ფასი - 1,50 ლარი.
არაკონდიციური „საფერავის" შემთხვევაში, რომლის შაქრიანობა 17%-დან 21%-მდეა ან/და ყურძენი ნაწილობრივ დაზიანებულია, ფასი 0,90 ლარს შეადგენს. 17%-ზე ნაკლები შაქრიანობის ან/და დაზიანებული „საფერავის" ფასი კი 0,30 ლარით განისაზღვრა.
„ვაზისა და ღვინის შესახებ“ საქართველოს კანონით ნებადართული ვაზის ჯიშებისგან მოწეული სხვა ყურძნის შემთხვევაში, შაქრიანობის არანაკლებ 20%-ის მქონე და დაუზიანებელი ყურძნის ფასი 1,30 ლარს შეადგენს.
17%-დან 20%-მდე შაქრიანობის შემთხვევაში ფასი 0,80 ლარი, ხოლო 17%-ზე ნაკლები შაქრიანობის შემთხვევაში - 0,30 ლარი.
საქართველოში ყურძნის მოსავლის აღება შემოდგომაზე ხდება. რთველი კახეთის რეგიონში აგვისტოს ბოლოს – სექტემბრის პირველ დღეებში იწყება და ქვეყნის მთიან რეგიონებში, მათ შორის ლეგენდარული „ხვანჭკარის" სამშობლო – რაჭაში სრულდება.
ბოლო მონაცემებით, ამ დროისთვის კახეთის მასშტაბით 32 ათას ტონამდე ყურძენია გადამუშავებული - 19 ათასი ტონა „საფერავი", 7,5 ათასი ტონა „რქაწითელი" და სხვადასხვა ჯიშის ყურძენი.
წლევანდელი მოსავლის საპროგნოზო მაჩვენებელი 320 ათასი ტონის ფარგლებშია.
სააგენტოს ცნობით, ამ ეტაპზე რთველის საკოორდინაციო შტაბში 500-მდე ღვინის კომპანიაა დარეგისტრირებული, რომლებიც ყურძნის მიღების პროცესში ეტაპობრივად ჩაერთვებიან. სახელმწიფო საწარმო „მოსავლის მართვის კომპანია“ მევენახეებისგან ყურძენს 14 ლოკაციაზე იბარებს კახეთის სხვადასხვა მუნიციპალიტეტში.
