„არც დასავლეთს და არც აღმოსავლეთს არ ვემსახურები“: ყოფილი პრემიერის ახალი წერილი ციხიდან
© photo: Sputnik / Stringer
გამოწერა
მმართველი პარტიის წარმომადგენლები დარწმუნებული არიან, რომ ღარიბაშვილი ციხიდან გამოგზავნილი წერილებით საზოგადოებრივი აზრის თავის მხარეს გადაბირებას ცდილობს.
თბილისი, 8 სექტემბერი — Sputnik. მე არც დასავლეთს და არც აღმოსავლეთს არ ვემსახურები, მე საქართველოს ვემსახურები“, ნათქვამია მსჯავრდებული ექს-პრემიერ ირაკლი ღარიბაშვილის ციხიდან გამოგზავნილ რიგით მეექვსე წერილში, რომელშიც ღარიბაშვილი აფასებს ხელისუფლების რეაქციას მის მოწოდებაზე, გამოიძიონ უფლებადამცველი ლაზარე ჯორბენაძის გარდაცვალების გარემოებები და ამასთან პრემიერ-მინისტრ ირაკლი კობახიძის შესაძლო კავშირი.
პენიტენციური დაწესებულებიდან გამოგზავნილ წინა წერილში ღარიბაშვილმა ცალკე წამოჭრა უფლებადამცველ ლაზარე ჯორბენაძის გარდაცვალების საკითხი, რომელმაც ერთ-ერთ სტატიაში პრემიერ ირაკლი კობახიძის მმართველობა გააკრიტიკა. ღარიბაშვილმა მოითხოვა არა მხოლოდ ჯორბენაძის გარდაცვალების გარემოებების, არამედ არაერთი თვითმკვლელობის ფაქტის გამოძიება, რომლებიც კობახიძისა და სუს-ის ყოფილი ხელმძღვანელის, მამუკა მდინარაძის ხელისუფლების დროს მოხდა.
„თავი დაანებეთ ჩემ წინააღმდეგ ამ ბინძურ პოლიტიკურ თამაშებს! ხალხმა იცის, ვინ არის ირაკლი ღარიბაშვილი, და ჩვენი საზოგადოება ჩემს სიტყვასა და თქვენს სიტყვას ძალიან კარგად განასხვავებს. ხალხმა ისიც კარგად იცის, რომ მე არც დასავლეთს, არც აღმოსავლეთს, არც ჩრდილოეთს და არც სამხრეთს არ ვემსახურები. მე საქართველოს ვემსახურები!“, -დაწერა ღარიბაშვილმა.
ღარიბაშვილის თქმით, ხელისუფლების პანიკურმა რეაქციამ მის მიერ ლაზარე ჯორბენაძის გარდაცვალების გარემოებების ხსენებაზე და აბსოლუტურად არაადეკვატურმა ქცევამ სისტემა სრულად ამხილა.
„საზოგადოებამ იხილა ხელისუფლების მორიგი სასაცილო და, ამავდროულად, სრულიად ამაზრზენი და ტრაგიკული მასკარადი. ნაცვლად იმისა, რომ ხელისუფლებას დროული და გამჭვირვალე განმარტებები გაეკეთებინა კონკრეტულ ფაქტებსა და დასმულ კითხვებთან დაკავშირებით, ვიხილეთ არასერიოზული გამოკითხვების სერია, რომლის ერთ-ერთი მთავარი მიზანი იყო ჩემი დაკავშირება „ნაციონალურ მოძრაობასთან“,- დაწერა ღარიბაშვილმა.
ექს-პრემიერმა ყურადღება გაამახვილა იმაზე, რომ თითქმის ხუთი თვეა მიმდინარეობს გამოძიება ჯორბენაძის თვითმკვლელობამდე მიყვანის საქმეზე, თუმცა ის ადამიანები და ჟურნალისტები, რომლებიც მთელი ამ დროის განმავლობაში საჯაროდ სვამდნენ კითხვებს, დღემდე არ დაუკითხავთ.
ამასთან, ღარიბაშვილის თქმით, მისი წერილის გამოქვეყნებისთანავე დაუყოვნებლივ დაიწყეს ყველა იმ ადამიანის დაკითხვა, ვინც საჯაროდ გამოეხმაურა მის წერილს. ყოფილმა პრემიერმა მიმდინარე მოვლენები მის წინააღმდეგ მიმართულ პოლიტიკურ კამპანიად შეაფასა და მსგავსი ქმედებების შეწყვეტისკენ მოუწოდა. ხაზგასმით აღნიშნა რა, რომ ქართული საზოგადოება მას კარგად იცნობს და თავად შეუძლია მისი პოზიციის შეფასება.
ხელისუფლების წარმომადგენლებიდან, რომლებიც მას საჯაროდ აკრიტიკებდნენ, ღარიბაშვილმა მხოლოდ პარლამენტის თავმჯდომარე შალვა პაპუაშვილს უპასუხა.
ექს-პრემიერმა უარყო მტკიცებულება იმის შესახებ, რომ მიმდინარე მოვლენები სამართლებრივ პროცესს წარმოადგენს და მას დაუნდობელი პოლიტიკური დევნა უწოდა. მისი თქმით, ის არ აწარმოებს ხელისუფლების არც ერთ წარმომადგენელთან ბრძოლას, თუმცა მიიჩნევს, რომ ყოფილმა თანამებრძოლებმა უღალატეს და ახლა იძულებულია დაიცვას თავი და საკუთარი ოჯახი იმისგან, რასაც უსამართლო და სასტიკ მოპყრობად აფასებს.
„ქართული ოცნების“ რეაქცია
მმართველ პარტიაში ირაკლი ღარიბაშვილის მორიგი ბრალდებების შემცველი წერილის შემდეგ სვამენ კითხვას: ის ხელისუფლების წინააღმდეგ მიმართული ცრუ კამპანიის ორგანიზატორია თუ უბრალოდ მისი მონაწილე.
„საკითხავი ის არის, ირაკლი ღარიბაშვილი ჩაერთო ამ კამპანიაში თუ მის მიერ არის ორგანიზებული ეს ყველაფერი. ალბათ არ შეიძლება, რომ საკუთარი თავის გადასარჩენად გამოიყენო გარდაცვლილი ადამიანის მიერ მიცემული ისეთი ინტერვიუ, რომელსაც ინტერვიუს ვერ ვუწოდებთ“, – მიიჩნევს პარლამენტის იურიდიულ საკითხთა კომიტეტის თავმჯდომარე არჩილ გორდულაძე.
თავდაცვის კომიტეტის თავმჯდომარის მოადგილე თენგიზ შარმანაშვილი კი ღარიბაშვილის წერილებს პროპაგანდისტულ ნაბიჯად აფასებს.
„ეს არის წმინდა წყლის პროპაგანდისტული ნაბიჯი, რომელსაც უნდა დაეზიანებინა სახელმწიფო ხელისუფლების ორგანოები, მაგრამ ფაქტი ერთია – არავითარი დამატებითი საკითხები, მათ შორის გარეჯის მონაკვეთთან დაკავშირებით, არ მომხდარა. ყველაზე გულდასაწყვეტი ის არის, რომ ეს ღარიბაშვილმა თვითონაც კარგად იცის, იმიტომ რომ წლების განმავლობაში თვალყურს ადევნებდა და ხელმძღვანელობდა საერთაშორისო ურთიერთობებსაც, იმიტომ რომ პრემიერ-მინისტრი იყო“, – განაცხადა შარმანაშვილმა.
„ხალხის ძალის“ აღმასრულებელი მდივანი გურამ მაჭარაშვილი კი კონკრეტული მტკიცებულებების გამოქვეყნების საჭიროებაზე მიუთითებს.
მისი თქმით იმ განცხადებებიდან რაც გაჟღერდა, ჩანს, რომ რაიმე დეტალებზე, კონკრეტიკაზე საუბარი უძნელდებოდა თავად ამ ადამიანს. ამავდროულად, ეს ძალიან სენსიტიური საკითხია, იმიტომ რომ მოხდა სუიციდის ფაქტი. თუკი არსებობს რაიმე ტიპის მტკიცებულება, მაშინ ეს უნდა გამოაქვეყნონ, თქვან, დეტალებში, მოწმეებით და ა.შ.
ღარიბაშვილის ღია წერილები
აგვისტოში ექს-პრემიერმა ირაკლი ღარიბაშვილმა რამდენიმე წერილი გამოაქვეყნა. ერთ-ერთ მათგანში ღარიბაშვილმა ახსენა გზავნილი, რომელიც, მისი თქმით, 2026 წლის ივლისში მიიღო მდინარაძისგან, რომელსაც მმართველ პარტიაში გავლენიანი თანამდებობა ეკავა. წერილში ნათქვამი იყო, რომ ღარიბაშვილის წინააღმდეგ ახალი სისხლის სამართლის საქმე მზადდებოდა, რათა თავიდან აეცილებინათ მისი პოლიტიკაში დაბრუნება. თავად მდინარაძემ ღარიბაშვილის ბრალდებებს აბსურდული უწოდა.
მმართველი პარტიის წარმომადგენლები დარწმუნებული არიან, რომ ღარიბაშვილი ციხიდან გამოგზავნილი წერილებით საზოგადოებრივი აზრის თავის მხარეს გადაბირებას ცდილობს.
საქართველოს პროკურატურამ ღარიბაშვილის წინააღმდეგ ახალი სისხლის სამართლის საქმის გამოძიება 12 აგვისტოს, პირველი წერილის გამოქვეყნებამდე დაიწყო. 24 აგვისტოს ფულის გათეთრებისთვის პატიმრობაში მყოფ ექს-პრემიერს ახალი ბრალი - ქრთამის აღება - წარედგინა. დანაშაული 11-დან 15 წლამდე ვადით თავისუფლების აღკვეთას ითვალისწინებს.
უწყების ცნობით, თავდაცვის სამინისტროსთვის საჭირო სამედიცინო აპარატურისა და ინვენტარის შეძენის ფარგლებში ღარიბაშვილმა ქრთამის სახით ხელზე 750 ათასი ლარი აიღო, საერთო ჯამში კი სახელმწიფოს 6.985,255 ლარის ქონებრივი ზიანი მიადგა.
ღარიბაშვილის წინააღმდეგ ჩვენება მისცეს ამ საქმეში დამნაშავედ ცნობილმა თავდაცვის ყოფილმა მინისტრმა ჯუანშერ ბურჭულაძემ და მისმა ნათესავმა, ალექსანდრე მხეიძემ.
