საქართველოში ჩინური ენის შესწავლისადმი ინტერესი იზრდება – ფოტო

კონკურსის „ჩინური ენის ხიდი“ დასკვნითი ეტაპი თბილისის თავისუფალ უნივერსიტეტში არსებულ კონფუცის ინსტიტუტში გაიმართა.

კონკურსის ფინალში 14-მა ქართველმა სტუდენტმა მიიღო მონაწილეობა.

ჟიურიმ გამარჯვებულებული კონკურსის სამივე ეტაპის შემდეგ გამოავლინა.

სტუდენტები აუდიტორიის წინაშე სიტყვით ჩინურ ენაზე გამოვიდნენ.

მათ ჟიური კითხვებს უპასუხეს.

ამასთან, თითოეულმა მონაწილემ მოამზადა საკუთარი შემოქმედებითი გამოსვლა.

კონკურის მსვლელობას თვალყურს ადევნებდნენ სტუდენტების ახლობლები და მეგობრები.

კონკურსში პირველი ადგილი თბილისის სახელმწიფო უნივერსიტეტის სტუდენტმა ლუკა ყურუამ დაიკავა. „ჩემი სამეცნიერო ინტერესები ფოკუსირებულია ჩინეთის ისტორიაზე, მის კულტურაზე, საერთაშორისო კავშირებსა და ისტორიულ მემკვიდრეობაზე“, – განაცხადა გამარჯვებულმა.

ლუკა ყურუა რამდენიმე წელია თსუ-ში სინოლოგიას სწავლობს. ახლა ის საქართველოს წარადგენს ჩინეთში „ჩინური ენის ხიდის“ 25-ე კონკურსის ფინალში. ასევე, სტუდენტს ექნება შესაძლებლობა გაიაროს სტაჟირება ჩინეთის ერთ-ერთ უმაღლეს სასწავლებელში.

საქართველოში ჩინეთის საელჩოს წარმომადგენელმა დაი ჩუნიუნმა განაცხადა, რომ კონკურსი „ჩინური ენის ხიდი“ ერთგვარი ოლიმპიადაა ყველასთვის, ვისაც ჩინური ენის შესწავლა სურს.

ეს არ არის მხოლოდ შეჯიბრი ენის ცოდნაში, არამედ არის პლატფორმაც, რომელიც ხელს უწყობს კულტურულ გაცვლასა და მეგობრობის განმტკიცებას სხვადასხვა ქვეყნის ახალგაზრდებს შორის“, – განაცხადა ჩუნიუნმა.

წელს კონკურსის მთავარი თემაა ერთი სამყარო, ერთი ოჯახი“, რაც უნდა ასახავდეს სამყაროს, როგორც ერთიანი ოჯახის აღქმის იდეას, სადაც ადამიანები ჰარმონიასა და თანხმობაში ცხოვრობენ.

კონკურსი ორგანიზებული იყო ჩინეთის სახალხო რესპუბლიკის საელჩოსა და თავისუფალ უნივერსიტეტში არსებული კონფუცის ინსტიტუტის მიერ.

თბილისში გამართული კონკურსის ყველა მონაწილემ მიიღო სამახსოვრო წამახალისებელი საჩუქრები

პირველ სამ ადგილზე გასულ გამარჯვებულებს გადაეცათ პრიზები.