Raffaello და Jacobs Monarch: თბილისში კუსტარულ საწარმოში ყავასა და ტკბილეულს ამზადებდნენ

© Ministry of Finance Investigation Serviceფალსიფიცირებული ყავა
ფალსიფიცირებული ყავა - Sputnik საქართველო, 1920, 21.10.2025
გამოწერა
გამოძიება გრძელდება როგორც სხვა დამნაშავეების დასადგენად, ასევე იმ ობიექტების დადგენა-გამოვლენის მიზნით, სადაც პროდუქცია იყიდებოდა.
თბილისი, 21 ოქტომბერი — Sputnik. ფინანსთა სამინისტროს საგამოძიებო სამსახურმა ჯგუფურად, დიდი ოდენობით სხვისი სასაქონლო ნიშნის უკანონო დამზადება-გამოყენების ფაქტზე ორი პირი დააკავა, ნათქვამია უწყების მიერ გავრცელებულ განცხადებაში.
გამოძიების მიხედვით, ბრალდებულებს თბილისში მოწყობილი ჰქონდათ კუსტარული საწარმო, სადაც სისტემატურად ამზადებდნენ ტკბილეულსა და ყავას, შემდეგ აღნიშნულ პროდუქციას უკანონოდ ადებდნენ Raffaello-სა და Jacobs Monarch-ის სასაქონლო ნიშანს და ყიდდნენ.
საგამოძიებო მოქმედებების შედეგად ამოღებულია სარეალიზაციოდ გამზადებული, 10 ათას ერთეულზე მეტი Jacobs Monarch-ის სასაქონლო ნიშნით უკანონო ნიშანდებული ერთჯერადი ყავა და 2,4 ათას ერთეულზე მეტი Raffaello-ს სასაქონლო ნიშნით უკანონო ნიშანდებული ტკბილეული.
ასევე ჩხრეკის შედეგად აღმოჩენილი და ამოღებულია ყავა Jacobs Monarch-ისა და Carte Noire-ის სასაქონლო ნიშნით უკანონო ნიშანდებული ლენტები, ვადაგასული ტკბილეული Kinder Schokolade, Jacobs Monarch-ისა და Raffaello-ს ყუთები, ყალიბები, ბეჭდები და პროდუქციის შეფუთვისათვის და წარმოებისათვის განკუთვნილი ტექნიკური დანადგარები.
საქმეზე გრძელდება საგამოძიებო და ოპერატიული ღონისძიებები, როგორც აღნიშნულ დანაშაულებრივ ქმედებაში ჩართული სხვა პირების დადგენა-მხილების, ასევე იმ ობიექტების დადგენა-გამოვლენის მიზნით, სადაც იყიდებოდა აღნიშნული პროდუქცია.
გამოძიება მიმდინარეობს სსკ-ია 196-ე მუხლით, რაც სასჯელის სახით ითვალისწინებს თავისუფლების აღკვეთას სამიდან ხუთ წლამდე ვადით.
ყველა ახალი ამბავი
0