მასშტაბურმა ხანძარმა თბილისში ყოფილი „ბორჯომის ვაგზალი“ გაანადგურა – ფოტო

ბოლო პერიოდში მსხვილ სავაჭრო ობიექტზე მასშტაბური ხანძარი პირველად გაჩნდა

ცეცხლი თბილისის ცენტრში, დილის 6 საათზე ყოფილი „ბორჯომის ვაგზლის“ შენობაში გაჩნდა.

ხანძრის ჩაქრობაში დაახლოებით 30 სახანძრო-სამაშველო ეკიპაჟი იყო ჩართული.

მოვაჭრეები, მაღაზიებისა და საწყობების მფლობელები დილიდან ცდილობდნენ თავიანთი საქონლის ცეცხლისგან გადარჩენას.

ყოფილი „ბორჯომის ვაგზლის“ შენობაში ათობით მაღაზია და საწყობი იყო განთავსებული.

იქ იყიდებოდა და ინახებოდა ტანსაცმელი და ფეხსაცმელი, საყოფაცხოვრებო ელექტროსაქონელი, სასკოლო ნივთები, საღებავები, წიგნები, საკვები პროდუქტები და სხვა საქონელი.

უკვე ცნობილია ხანძრის შედეგად განადგურებული ტერიტორიის ფართობი - დაახლოებით 15 ათასი კვადრატული მეტრი.

მაგრამ ზარალის ოდენობა ჯერ კიდევ დასადგენია.

ასევე, გამოძიებამ უნდა დაადგინოს ხანძრის გამომწვევი მიზეზები.

საბედნიეროდ, ხანძარს მსხვერპლი არ მოჰყოლია. ცეცხლის გაჩენის დროს შენობაში და მიმდებარე ბაზრის ტერიტორიაზე ვაჭრობა ჯერ არ იყო დაწყებული.

სავარაუდოდ, ამ ხანძრის შემდეგ, ყოფილი „ბორჯომის ვაგზლის“ შენობის დემონტაჟი მოხდება.

ნაკლებად სავარაუდოა, რომ მისი აღდგენა შესაძლებელი იყოს. ხანძრის გამო გადახურვის ნაწილი ჩამონგრეულია.

ყოფილი „ბორჯომის ვაგზლის“ დამწვარი შენობის გვერდით ადრე დიდი სავაჭრო ცენტრი „ბავშვთა სამყარო“ მდებარეობდა

„ბავშვთა სამყაროს“ შენობა 2017 წლის იანვარში მასშტაბურმა ხანძარმა გაანადგურა და მას შემდეგ ეს ტერიტორია ფაქტიურად ცარიელია და იქ ჯერ კიდევ არაფერი აუშენებიათ.