რთველი-2024: საქართველოში რეკორდული რაოდენობის ყურძენი გადამუშავდა
© National Wine Agency of Georgia
გამოწერა
ღვინის ეროვნული სააგენტო 2024 წლის რთველის შედეგების შეჯამებას აქვეყნებს
თბილისი, 24 ოქტომბერი — Sputnik. 2024 წელს, რთველის ფარგლებში გადამუშავდა დამოუკიდებელი საქართველოს ისტორიაში უპრეცედენტო რაოდენობის - 320 ათას ტონამდე ყურძენი, რაც დაახლოებით 45%-ით აღემატება გასული წლის ანალოგიურ მაჩვენებელს, იუწყება ღვინის ეროვნული სააგენტო.
სააგენტოს ცნობით, მიმდინარე წლის მოსავალი, რაოდენობასთან ერთად, გამოირჩეოდა მაღალი ხარისხით. ღვინის კერძო სექტორი ორიენტირებული იყო ხარისხიანი ყურძნის შეძენაზე და შესაბამისად, მიმდინარე წლის მოსავლის ღვინოებიც იქნება გამორჩეული, მრავალფეროვანი და ხარისხიანი, აღნიშნეს ღვინის ეროვნულ სააგენტოში.
დღეის მდგომარეობით, ქვეყნის მასშტაბით მოსავალი სრულად დაბინავებულია. ყურძენი ღვინის საწარმოებს 21.300-მდე მევენახე ფერმერმა ჩააბარა.
მევენახეობის მთავარ რეგიონებში, კახეთსა და რაჭა-ლეჩხუმში გადამუშავდა 291 ათას ტონამდე ყურძენი. ყურძნის რეალიზაციით მიღებულმა შემოსავალმა 390 მილიონ ლარს მიაღწია.
კლიმატური პირობებიდან გამომდინარე, წელს მოსავლის დაბინავება როგორც კახეთში, ისე რაჭა-ლეჩხუმში ნაადრევად დაიწყო: კახეთში 13 აგვისტოდან, რაჭაში 23 სექტემბრიდან და ლეჩხუმში 4 ოქტომბრიდან.
ყურძნის გადამუშავების პროცესში, ჯამში, ჩართული იყო 600 ღვინის მწარმოებელი დიდი კომპანია, საშუალო და მცირე მარანი.
ძირითადი ინდუსტრიული ჯიშებიდან გადამუშავებულია:
„რქაწითელი“ - 136 ათასი ტონა
„საფერავი“ - 130 ათასი ტონა
„კახური მწვანე“ - 5,9 ათასი ტონა
„ალექსადრეულ/მუჯურეთული“, რაჭა - 1618 ტონა
„ცოლიკაური“, ცაგერი - 753 ტონა
დანარჩენი სხვა ჯიშების ყურძენია.
ძირითადი ინდუსტრიული ჯიშების 1 კგ ყურძნის ფასები იყო:
„რქაწითელი“ – 1,00-დან 1,20 ლარის ფარგლებში
„საფერავი“ - 1,50-1,60 ლარის ფარგლებში
„ალექსანდრეულ/მუჯურეთული“ - 8 ლარი
„ცოლიკაური“ („ტვიშის“) – 8 ლარი, „ცაგერის ცოლიკაური“ - 5 ლარი.
მევენახე ფერმერების მიერ მოსავლის რეალიზაციის ხელშეწყობის, ყურძნის ხარისხის შენარჩუნებისა და მეღვინეობის დარგის სტაბილური განვითარების მხარდაჭერის მიზნით საქართველოს მთავრობამ რთველის სუბსიდირება განახორციელა:
კახეთის რეგიონში სახელმწიფო სუბსიდიას იღებს ყველა ის კომპანია, რომელიც 1 კგ რქაწითელში მევენახეს არანაკლებ 1,00 ლარი გადაუხადა.
ასევე, 13 სექტემბრიდან, შპს „მოსავლის მართვის კომპანია“ მევენახე ფერმერებისგან 1 კგ საფერავის ჯიშის ყურძენს 1,50 ლარად იბარებს. ხოლო მევენახეებმა, რომლებსაც 13 სექტემბრამდე ლარნახევარზე ნაკლებ ფასად ჩააბარეს საფერავის ჯიშის ყურძენი, საქართველოს მთავრობამ დაუკომპენსირა სხვაობა ლარნახევარსა და მიღებულ საფასურს შორის.
რაჭის რეგიონში, სუბსიდიას იღებს ყველა ის კომპანია, რომელმაც „ხვანჭკარას“ მიკროზონაში მოწეული 1 კგ „ალექსანდროულისა“ და „მუჯურეთულის“ ჯიშის ყურძენში მევენახეს გადაუხადა სულ მცირე 8 ლარი. 1 კგ „ალექსანდროულისა“ და 1 კგ „მუჯურეთულის“ შესყიდვის სანაცვლოდ, კომპანიებზე 4 ლარის ოდენობის სახელმწიფო სუბსიდია გაიცემა.
საკოორდინაციო შტაბის ორგანიზებით, 23-24 აგვისტოს კახეთის რეგიონში მოსული ძლიერი სეტყვისა და ქარისგან დაზიანებული ყურძნის ჩაბარება შპს „მოსავლის მართვის კომპანიამ" ოპერატიულად, სტიქიის მეორე დღიდანვე დაიწყო. ყვარლის, თელავის და ახმეტის მუნიციპალიტეტებში დასეტყვილ ყურძენს კომპანია თელავის და ყვარლის მუნიციპალიტეტებში იბარებდა. მევენახეებმა დაზიანებული, არაკონდიციური 1 კგ ყურძენი 1.00 ლარად ჩააბარეს. სულ გადამუშავდა 1800 ტონამდე დასეტყვილი ყურძენი. სეტყვისგან დაზიანებული ყურძენი სახელმწიფო საწარმომ შპს „მოსავლის მართვის კომპანია" სპირტის დასამზადებლად გადაამუშავა.
