„ახალი": გვარამია + მელიას პოლიტიკური ტანდემი შედგა
15:49 11.03.2024 (განახლებულია: 20:04 11.03.2024)
© photo: Sputnik / Vladimir Umikashvili
გამოწერა
ახლადშექმნილი პარტიის სახელი „ახალი", საარჩევნო ნომერი №4.
თბილისი, 11 მარტი — Sputnik. „ერთიანი ნაციონალური მოძრაობის" ყოფილმა თავმჯდომარე ნიკა მელიამ და ოპოზიციური ტელეკომპანია „მთავარი არხის" დამფუძნებელმა ნიკა გვარამიამ წინასაარჩევნოდ ახალი პოლიტიკური გაერთიანება „ახალი" დააფუძნეს.
გვარამიამ, რომელმაც პოლიტიკაში მოსვლა გადაწყვიტა, საპარლამენტო არჩევნების წინ ის პარტიები დაასახელა, რომლებთანაც მზადაა კოალიცია შექმნას, მათ შორის იყო „ნაცმოძრაობის“ ყოფილი ლიდერის ნიკა მელიას გუნდი. ჯერ კიდევ თებერვლის დასაწყისში, საპატიმროს დატოვებიდან შვიდი თვის შემდეგ, გვარამიამ შეკრიბა გუნდი სახელწოდებით „ახალი“ და განაცხადა, რომ მუშაობს მოკლევადიან და სწრაფ კამპანიაზე, რომელიც ორიენტირებულია მომავალზე.
„დღეს ჩვენ ვამბობთ და ვადასტურებთ, რომ შედგა ერთობა ადამიანებისა, რომლებსაც, პირველ რიგში, გვაერთიანებს მომავალი. მომავალია ჩვენი საერთო მიზანი, გამარჯვებაა ჩვენი საერთო მიზანი და არა შურისძიება. სიახლე არის ჩვენი მიზანი, ახლის მოპოვებაა ჩვენი მიზანი და არა წარსულთან ანგარიშსწორება", - განაცხადა მელიამ.
პარტია საპარლამენტო არჩევნებზე საარჩევნო ნომრით „4" მიიღებს მონაწილეობა. ახალი პოლიტიკური ძალის ფერი - მწვანე და ნარინჯისფერია, სიმბოლო - ისარი.
მელიას თქმით, ძალების გაერთიანებაზე საუბარი 3 თვის განმავობაში მიმდინარეობდა და გადაწყვეტილების მიღებისას ორივე პოლიტიკოსი ათასობით აქტიური ამომრჩევლის ინტერესებით ხელმძღვანელობდა.
როგორც გვარამიამ აღნიშნა, ქვეყანაში, სადაც მხოლოდ წარსულზე საუბრობენ, მთავარი და ყველაზე მნიშვნელოვანია ის, რომ იგი და მელია მხოლოდ წინ წავლენ.
„ჩვენი გაერთიანება არის „ახალი“, ჩვენ ვართ ერთად, ვიბრძვით საქართველოში ახალი გზებით ცვლილებებისთვის... ჩვენ ვიცით ბრძოლა, ვიცით, რა ფასი აქვს მოუსყიდაობას, სამშობლოს მსახურებას, ვიცით, როგორ დავძლიოთ სირთულეები და როგორ დავძლიოთ გამოწვევები", - განაცხადა გვარამიამ.
მისი თქმით, ის არის დიდი გაერთიანებების მხარდამჭერი და მხოლოდ ამაში ხედავს გამარჯვებას მომავალ არჩევნებში.
„ჩვენ ჯერ ჩვენში უნდა დავამარცხოთ ამბიციები და მხოლოდ ამის შემდეგ, ამ გაერთიანების შემდეგ შევძლებთ ბიძინა ივანიშვილის რეჟიმის დამარცხებას“, - აღნიშნა გვარამიამ.
მმართველ პარტიაში გაერთიანებაზე რეაქციები
საპარლამენტო უმრავლესობის წევრ ირაკლი ზარქუას განცხადებით, ნიკა გვარამია და ნიკა მელია ვერ მოახერხებენ საზოგადოების მოტყუებას იმის თაობაზე, რომ თითქოს ისინი „ნაციონალურ მოძრაობას" გაემიჯნენ.
ამასთან, დეპუტატის თქმით, ასეთი გაერთიანება 26 ოქტომბრის საპარლამენტო არჩევნების წინ, უპირველეს ყოვლისა, დააზარალებს „ნაციონალურ მოძრაობას" და მის თავმჯდომარე ლევან ხაბეიშვილს.
„ორი ნიკა, ორი მამალი „ნაცი“ ერთიანდება ახალი ლოგოს, ახალი ნომრის ქვეშ და ერქმევათ „ახალი ნაცები“. ეს პირდაპირ ურტყამს ჩემს ხაბეს. პირდაპირ ურტყამს „კარენოი“ ნაცებს, რადგან მათი ხმები მიაქვთ. ეტყობა, რაღაც ვერ გაიყვეს", - განაცხადა ზარქუამ.
მისი თქმით, ბრძოლა მიდის იმაზე, თუ ვის დააფინანსებს თავდაცვის ექს-მინისტრი დავით კეზერაშვილი.
2024 წლის შემოდგომაზე საქართველოში საპარლამენტო არჩევნები გაიმართება, რომელიც განსაზღვრავს ვინ მართავს ქვეყანას მომდევნო ოთხი წლის განმავლობაში. 2012 წლიდან ხელისუფლება მილიარდერ ბიძინა ივანიშვილის მიერ დაარსებული პოლიტიკური ძალის ხელშია - თავიდან ეს იყო კოალიცია „ქართული ოცნება“, ხოლო 2016 წლიდან, როცა კოალიცია დაიშალა, ყველა არჩევნები მოიგო ერთმა პარტიამ – „ქართული ოცნება – დემოკრატიულმა საქართველომ".
მოკლედ გვარამიას შესახებ
მიხეილ სააკაშვილის პრეზიდენტობის დროს სხვადასხვა წელს გვარამიას მთავარი პროკურორის მოადგილის, იუსტიციის მინისტრისა და განათლების მინისტრის თანამდებობა ეკავა. 2012 წელს ხელისუფლებაში „ქართული ოცნების“ მოსვლის შემდეგ კი მან ჟურნალისტიკის სფეროში გადაინაცვლა.
ხელისუფლების ცვლილებიდან ათი წლის შემდეგ, 2022 წლის 16 მაისს, გვარამია, იმ დროისთვის უკვე ახალი ოპოზიციური ტელეარხ „მთავარი არხის" დამფუძნებელი და გენერალური დირექტორი, გისოსებს მიღმა აღმოჩნდა. მას სამსახურებრივი უფლებამოსილების გადამეტებისთვის 3 წლითა 6 თვით თავისუფლების აღკვეთა მიესაჯა. საუბარია ტელეკომპანია „რუსთავი 2“-სთვის 6,8 მილიონი ლარის ოდენობის ზარალის მიყენებაზე მაშინ, როცა გვარამია მისი გენერალური დირექტორი იყო.
მმართველ პარტიაში არაერთხელ განაცხადეს, რომ გვარამიამ თანხების „გადაქაჩვა" ტელეკომპანიიდან მაშინ დაიწყო, როცა მისი დაბრუნება ყოფილმა მფლობელმა ქიბარ ხალვაშმა გადაწყვიტა. ხალვაშის თქმით, გვარამიას მთავარი მიზანი „რუსთავი 2"-ის გაკოტრება იყო, რათა კომპანიის დაბრუნებას კანონიერი მფლობელისთვის აზრი დაეკარგა.
ოპოზიციის წარმომადგენლებმა არაერთხელ მოითხოვეს გვარამიას გათავისუფლება, რომელსაც პოლიტპატიმარს, სასამართლოს გადაწყვეტილებას კი უსამართლოს უწოდებდნენ.
შედეგად, საქართველოს პრეზიდენტმა სალომე ზურაბიშვილმა გვარამია 2023 წლის 22 ივნისს შეიწყალა.
გვარამიამ ციხის დატოვებისთანავე განაცხადა, რომ აღარ იქნება „მთავარი არხის" ხელმძღვანელი. 2023 წლის სექტემბერში მან პირდაპირ განაცხადა, რომ პოლიტიკაში აპირებს მოსვლას.
მოკლედ მელიას შესახებ
მელია ექს-პრეზიდენტ მიხეილ სააკაშვილის მიერ დაარსებულ „ნაციონალურ მოძრაობას" 2014 წელს შეუერთდა და 2023 წლის დეკემბრის დასაწყისში პარტიიდან წასვლის შესახებ განაცხადა.
„ნაციონალურ მოძრაობაში" კონფლიქტზე საუბარი ჯერ კიდევ 2021 წელს, ექს-პრეზიდენტ მიხეილ სააკაშვილის საქართველოში დაბრუნებისა და დაკავების შემდეგ დაიწყეს. 2023 წელს შიდაპარტიული არჩევნები ლევან ხაბეიშვილმა მოიგო, რომელმაც ნიკა მელია სააკაშვილის გათავისუფლებისთვის ბრძოლაში პასიურობაში დაადანაშაულა. მელია, თავის მხრივ, ხაბეიშვილს ყოფილი მაღალჩინოსნების ვანო მერაბიშვილისა და დავით კეზერაშვილის მარიონეტს უწოდებს.
მელიას მტკიცებას, რომ ხაბეიშვილი „ნაციონალური მოძრაობის" მხოლოდ ფორმალური ლიდერია, სააკაშვილის ფაქტორიც ამყარებს, რომელმაც ციხეში ყოფნისას პოლიტიკაში დაბრუნების შესახებ განაცხადა. მეტიც, „ნაციონალური მოძრაობის" ერთ-ერთმა წევრმა სოფო ჯაფარიძემ სააკაშვილის სახელით 2024 წლის საპარლამენტო არჩევნებისთვის წინასაარჩევნო კამპანია დაიწყო. მოგვიანებით მიიღეს გადაწყვეტილება, რომ ექს-პრეზიდენტი „ნაცმოძრაობის" პოლიტსაბჭოს უხელმძღვანელებს.
უფრო მეტიც, თავად ხაბეიშვილმა განაცხადა, რომ პარტიის მთავარი ლიდერი არის სააკაშვილი. როდესაც ის თავმჯდომარის არჩევნებში მონაწილეობას იღებდა, მხოლოდ იმ პირობებით, რომ სააკაშვილი პატიმარია. თავის მხრივ, „ნაცმოძრაობის" დეპუტატმა თინა ბოკუჩავამ განაცხადა, რომ სააკაშვილი ყოველთვის იყო, არის და იქნება გამაერთიანებელი პოლიტიკური ფიგურა.
ამავე დროს, ოფიციალურად სააკაშვილი პარტიის წევრიც არ არის. მას ამის უფლება არა აქვს, რადგან საქართველოს მოქალაქე არ არის. მან საქართველოს მოქალაქეობა წლების წინ დაკარგა, როდესაც უკრაინის მოქალაქე გახდა.
