საქართველოს კონკურენციის ეროვნული სააგენტო სახელწოდებას იცვლის
© photo: Sputnik / Stringer
გამოწერა
უწყებისთვის სახელწოდების შეცვლას კონკურენციის შესახებ კანონში შესული ცვლილებები ითვალისწინებს.
თბილისი, 13 დეკემბერი — Sputnik. ,,საქართველოს კონკურენციის ეროვნული სააგენტო" პირველი იანვრიდან სახელწოდებას იცვლის, ნათქვამია უწყების მიერ გავრცელებულ ინფორმაციაში.
სახელწოდების შეცვლას კონკურენციის შესახებ კანონში შესული ცვლილებები ითვალისწინებს.
უწყებაში განმარტავენ, რომ ცვლილებების მიხედვით, რომლებიც საქართველოს პარლამენტმა დარგობრივი ეკონომიკისა და ეკონომიკური პოლიტიკის კომიტეტის ინიცირებით მიიღო, ძლიერდება კონკურენციის პოლიტიკის ეფექტიანი აღსრულება, ზუსტდება ტექნიკური დეტალები/ტერმინები და იცვლება უწყების სახელწოდება.
„გამომდინარე იქიდან, რომ მომხმარებლის უფლებების დაცვის კანონის აღსრულების დაწყებით სააგენტოს მანდატი და ფუნქციები გაიზარდა, უწყების სახელწოდება დარედაქტირდა შემდეგნაირად - „საქართველოს კონკურენციისა და მომხმარებლის დაცვის სააგენტო" | Georgian Competition and Consumer Agency, -ნათქვამია გავრცელებულ ინფორმაციაში.
კერძოდ რას ითვალისწინებს კანონში შესული ცვლილებები:
სააგენტოს მიერ ადგილზე შემოწმებისას, უფლებამოსილი პირების ადგილზე არდაშვება ან/და შემოწმების პროცესის ხელის შეშლა გამოიწვევს ეკონომიკური აგენტის დაჯარიმებას. კერძოდ, ეკონომიკურ აგენტს დაეკისრება ჯარიმა 10.000 ლარის, ხოლო განმეორების შემთხვევაში - 20.000 ლარის ოდენობით.
საჭიროების შემთხვევაში, შესაძლებელია ადგილზე შემოწმების პროცესში მონაწილეობა სხვადასხვა სამართალდამცავი ან საექსპერტო უწყებების შესაბამისმა წარმომადგენლებმა მიიღონ.
კანონში წლიური ბრუნვის ცნება ჩანაცვლდა ტერმინით „ერთობლივი შემოსავალი", რაც შეესაბამება საქართველოს საგადასახადო კოდექსში არსებულ განმარტებას.
მიღებული ცვლილებების თანახმად, საჩივრის გახმობის ვადა იზღუდება და ეს შესაძლებელი იქნება მხოლოდ მხარის მიერ გადაწყვეტილების პროექტის მიღებამდე.
კანონმდებლობის შესაბამისად, სააგენტოს წინასწარ წერილობით, სრულყოფილად უნდა წარედგინოს შეტყობინება იმ კონცენტრაციის თაობაზე, რომლის მონაწილე ეკონომიკური აგენტის/ეკონომიკური აგენტების როგორც ინდივიდუალური, ისე ჯამური ერთობლივი შემოსავალი კონცენტრაციის განხორციელების წინა ფინანსური წლის განმავლობაში საქართველოს ტერიტორიაზე აღემატება კონცენტრაციის თაობაზე შეტყობინების წარდგენისა და განხილვის წესით დადგენილ ზღვრულ ოდენობას.
კონცენტრაციის თაობაზე შეტყობინების მიღებიდან 5-დღიანი სამუშაო ვადა 10 სამუშაო დღემდე გაიზარდა. ასევე, ფიზიკურ პირს, ვისაც კონცენტრაციის შეტყობინების ვალდებულება წარმოეშობა და ამ ვალდებულებას დაარღვევს, დაეკისრება ჯარიმა, მაქსიმუმ, 10 000 ლარის ოდენობით.
„კონკურენციის შესახებ" კანონში განხორციელებული ცვლილებებით დაინერგა თანამშრომლობის პროგრამაში მონაწილე პირის/პირების ვინაობისა და მათ მიერ მოწოდებული მონაცემების კონფიდენციალურობის გარანტიები.
„მიღებული ცვლილებები ევროკავშირის მიერ დაფინანსებული TWINNING-ის პროექტის ფარგლებში გაცემული რეკომენდაციის და სააგენტოს პრაქტიკაში მიღებული გამოცდილების გათვალისწინებით მომზადდა", - აღნიშნულია გავრცელებულ ინფორმაციაში.
