ეს ცხოვრების ახალი ეტაპის დასაწყისია: პრემიერმა ჩარიცხულ ახალგაზრდებს სტუდენტობა მიულოცა

© photo: Sputnik / Stringerთბილისის სახელმწიფო უნივერსიტეტი
თბილისის სახელმწიფო უნივერსიტეტი - Sputnik საქართველო, 1920, 01.09.2023
გამოწერა
НовостиTelegram
თბილისი, 1 სექტემბერი — Sputnik. საქართველოს პრემიერ-მინისტრმა ირაკლი ღარიბაშვილმა პირველკურსელებს ერთიანი ეროვნული გამოცდების წარმატებით ჩაბარება მიულოცა და ცხოვრების ახალ ეტაპზე წარმატება უსურვა, ნათქვამია სოციალურ ქსელში პრემიერის ოფიციალურ გვერდზე გავრცელებულ განცხადებაში.
2023 წელს ერთიანი ეროვნული გამოცდებისათვის რეგისტრაცია 45 ათასზე მეტმა აბიტურიენტმა გაიარა, გამოცდებზე აბიტურიენტების 94% გამოცხადდა. წელს სტუდენტი 32.843 ახალგაზრდა გახდა.

„ჩემო ახალგაზრდა მეგობრებო, ძვირფასო პირველკურსელებო, გულითადად გილოცავთ ყველას, ვინც წარმატებით ჩააბარეთ ერთიანი ეროვნული გამოცდები. ეს უმნიშვნელოვანესი მიღწევა თქვენი შრომის, სწავლისა და მონდომების დამსახურებული შედეგია. ამავე დროს ეს არის ცხოვრების სრულიად ახალი ეტაპის დასაწყისი", – დაწერა ღარიბაშვილმა.

როგორც პრემიერმა აღნიშნა, განათლებული ახალგაზრდობა ქვეყნის ძლიერებისა და პროგრესის, მისი უკეთესი მომავლის აუცილებელი პირობაა.

„ამიტომაც განათლება ჩვენი მთავრობისთვის, პირადად ჩემთვის უმნიშვნელოვანესი პრიორიტეტია და ყველაფერს გავაკეთებთ, რომ მაქსიმალურად შეგიწყოთ ხელი განვითარებაში. კიდევ ერთხელ გილოცავთ და წარმატებულ, საინტერესო სტუდენტობის გზას, თქვენ მიერ დასახული მიზნების მიღწევას გისურვებთ", – ნათქვამია მილოცვის წერილში.

საქართველოში ერთიანი ეროვნული გამოცდები 3 ივლისს ქართული ენისა და ლიტერატურის გამოცდით დაიწყო, ბოლო გამოცდა 23 ივლისს ჩატარდა. პირველადი შედეგების გამოცხადება 1 აგვისტოდან დაიწყო.
წელს ერთიან ეროვნულ გამოცდებზე აბიტურიენტებმა სამი გამოცდა ჩააბარეს – ქართული ენა და ლიტერატურა, უცხო ენა და ერთი საგანი შერჩევით – ლიტერატურა, მათემატიკა, ისტორია, გეოგრაფია, ქიმია, ფიზიკა, ბიოლოგია, სახვითი და გამოყენებით ხელოვნება ან სამოქალაქო განათლება.
ყველა ახალი ამბავი
0