საკვების გაცნობიერების პრაქტიკა, ანუ როგორ დავიკლოთ აკრძალვების გარეშე
14:35 08.06.2023 (განახლებულია: 10:49 17.08.2023)
© Pexels / Nataliya Vaitkevich
გამოწერა
თბილისი, 8 ივნისი — Sputnik. დიეტების ერთ-ერთი მთავარი ნაკლი ისაა, რომ მათში ძირითადი ყურადღება ფიზიკურ დატვირთვაზე, საკვებსა და მის რაოდენობაზეა გამახვილებული და არა იმაზე, თუ როგორ ვჭამთ, აცხადებენ სპეციალისტები.
მათი თქმით, ქანცგამომცლელი ფიზიკური ვარჯიშები კიდევ უფრო აძლიერებს მადას და ამიტომაც ადამიანი წონაში უმნიშვნელოდ იკლებს. ყოველივე ამას კი შედეგად ის მოსდევს, რომ დიეტის დაცვას თავს ანებებს და ისევ ჩვეულ კვებით ქცევას უბრუნდება.
ამიტომ თუ წონაში დაკლებას ცდილობთ, მაგრამ საყვარელ საკვებზე უარს ვერ ამბობთ, სცადეთ გამოიყენოთ გაცნობიერების პრაქტიკა. როდესაც ადამიანი მხოლოდ იმაზე ფიქრობს, რაც „არ შეიძლება“, ადრე თუ გვიან აუცილებლად ხარბად მიეტანება „აკრძალულ“ საკვებს. და რადგან არ იცის, როგორ უნდა იკვებოს გაცნობიერებულად, ყოველ ჯერზე სულ უფრო მეტს ჭამს.
გაცნობიერების პრაქტიკა — ეს არც დიეტაა და არც კვების რეჟიმი. ეს არის ახალი ქცევითი მიდგომა, რომლის გამოყენებაც ნებისმიერი საკვების შემთხვევაშია შესაძლებელი. და რაც უფრო ხშირად მიმართავთ ამ მეთოდს, მით უფრო იოლად შენიშნავთ შიმშილის დაკმაყოფილების პირველ ნიშნებს და დროულადაც შეჩერდებით.
საკვების გაცნობიერების პრაქტიკა
სპეციალისტები გვირჩევენ, რომ მეთოდი ყველა კვებისას გამოვიყენოთ, თუმცა თავდაპირველად შეგიძლიათ დღეში ერთხელ ჩაატაროთ.
დაჯექით მაგიდასთან, ღრმად ჩაისუნთქეთ და შეეცადეთ, რომ მაქსიმალურად შენელდეთ, ანუ, ავტომობილისტების ენაზე რომ ვთქვათ, მეხუთე სიჩქარე მეორეზე (ან მესამეზე მაინც) გადართეთ.
არ დაიწყოთ ჭამა მანამ, სანამ არ მიხვდებით, რომ შენელდით.
ამის მერე გაჩერდით სკამზე გაუნძრევლად 30 წამის განმავლობაში — სკამის საზურგეზე მიყრდნობილი და იატაკზე ფეხებჩამოშვებული. შეიგრძენით, როგორ მძიმდება სხეული, ხოლო კუნთების დაძაბულობა ქრება. ანუ მოდუნდით.
რამდენჯერმე ჩაისუნთქეთ ღრმად (მაშინაც კი, თუ სხვებთან ერთად ხართ სუფრაზე). ისუნთქეთ შეძლებისდაგვარად ღრმად — ისე, რომ ჰაერი მუცლის ქვედა ნაწილში ჩაიტანოთ.
შეიგრძენით, როგორ ფართოვდება ამ დროს ჰაერისგან გულ-მკერდის, ზურგისა და მუცლის არეები. შემდეგ კიდევ რამდენჯერმე ჩაისუნთქეთ ნელა და ღრმად და ისე დაიწყეთ ჭამა.
ჩაიდეთ ლუკმა პირში და ოცჯერ მაინც გაღეჭეთ. შეეცადეთ ახლებურად შეაფასოთ კერძის შემადგენლობა და მასში შემავალი პროდუქტების გემო. შეიგრძენით ყოველი გადაყლაპული ლუკმით მოგვრილი სიამოვნება.
თუ ღეჭვის რაოდენობას ვერ ითვლით, ყოველი მომდევნო ლუკმის ჩადებამდე პაუზა გააკეთეთ — თანაც სულ უფრო ხანგრძლივი. მაგალითად, თუ პირველ და მეორე ლუკმას შორის 5-წამიან ყოვნს გააკეთებთ, მეორესა და მესამეს შორის 6-7 წამით მაინც დაყოვნდით და ა.შ. დაიცავით შენელების ეს წესი ნებისმიერ შემთხვევაში, როგორ ძლიერადაც უნდა გშიოდეთ.
დროდადრო შეჩერდით და ყური დაუგდეთ ორგანიზმს, ანუ დააკვირდით, გრძნობთ თუ არა დანაყრებას. თუ გადაწყვეტთ, რომ ჯერ ისევ გშიათ, კუჭს კიდევ ერთი ლუკმა „მიაშველეთ“, მერე კი ჩანგალი გვერდზე გადადეთ.
თუ კერძი მოგრჩათ, ნუ შეეცდებით მის ბოლომდე შეჭმას — უთხარით თავს, რომ ამ გემრიელობის კიდევ ერთხელ დაგემოვნებას მოგვიანებითაც მოახერხებთ.
გამოიყენეთ გაცნობიერების პრაქტიკა ყველა კერძისა და პროდუქტის მიმართ — „აკრძალულისაც“ (რომლებიც ძალიან გიყვართ) და ჯანსაღისაც, და წონისთვის უსაფრთხოდ მიიღეთ სიამოვნება ჭამისგან.
