ტექნიკურ უნივერსიტეტსა და სურსათის ეროვნულ სააგენტოს შორის მემორანდუმი გაფორმდა

© photo: Sputnik / Stringerსაქართველოს სახელმწიფო ტექნიკური უნივერსიტეტი
საქართველოს სახელმწიფო ტექნიკური უნივერსიტეტი - Sputnik საქართველო, 1920, 21.02.2023
გამოწერა
მემორანდუმის მიზანი ორ უწყებას შორის საგანმანათლებლო სფეროში თანამშრომლობაა.
თბილისი, 21 თებერვალი – Sputnik. საქართველოს ტექნიკურ უნივერსიტეტსა (სტუ) და სურსათის ეროვნულ სააგენტოს (სეს) შორის თანამშრომლობის მემორანდუმი გაფორმდა, ნათქვამია უნივერსიტეტის მიერ გავრცელებულ განცხადებაში.
მემორანდუმს ხელი უნივერსიტეტის კანცლერმა კარლო კოპალიანმა და სეს-ის დირექტორმა ზურაბ ჩეკურაშვილმა მოაწერეს.
შეთანხმების მიხედვით, ვეტერინარიის მიმართულების პროგრამის სტუდენტები და კურსდამთავრებულები სააგენტოში გაივლიან პრაქტიკას, რაც, უწყების ცნობით, ხელს შეუწყობს კვალიფიკაციის ამაღლებასა და პროფესიული უნარ-ჩვევების გამომუშავებას.
გარდა ამისა, უნივერსიტეტი და სააგენტო ითანამშრომლებენ სურსათის/ცხოველის საკვების უვნებლობის, ვეტერინარიისა და მცენარეთა დაცვის სფეროში საგანმანათლებლო პროგრამების განვითარების ხელშეწყობის მიმართულებით.
როგორც კარლო კოპალიანმა განაცხადა, ქვეყანაში პროფესიონალ ვეტერინართა ნაკლებობაა და საქართველოს ტექნიკური უნივერსიტეტი მზადაა ხელი შეუწყოს დარგის განვითარებას და მოამზადოს შესაბამისი კადრები.

„მემორანდუმი საშუალებას მოგვცემს, ჩვენმა სტუდენტებმა, უნივერსიტეტში მიღებულ ცოდნასთან ერთად, აუცილებელი პრაქტიკული უნარ-ჩვევებიც ნაყოფიერად გამოიყენონ", – აღნიშნა უნივერსიტეტის კანცლერმა.

სურსათის ეროვნული სააგენტოს უფროსმაც უნივერსიტეტთან თანამშრომლობასა და დარგის განვითარების მნიშვნელობაზე გაამახვილა ყურადღება და აღნიშნა, რომ სააგენტო აქტიურად დაუჭერს მხარს და პრაქტიკულად მოამზადებს ახალგაზრდებს.
„მხედველობაში მაქვს საველე გასვლები, პროფილაქტიკური აცრები, ნიშანდება, საკარანტინო კონტროლი, რათა მომავალში გვყავდეს პროფესიონალი ვეტერინარები“, – განაცხადა ჩეკურაშვილმა.
უწყების ცნობით, სურსათის ეროვნულ სააგენტოსთან გაფორმებული მემორანდუმით გათვალისწინებულია მხარეთა მიერ სხვადასხვა აქტივობების ერთობლივი დაგეგმვა და განხორციელება.
ეწვიეთ „Sputnik საქართველოს“ Telegram-არხს
ყველა ახალი ამბავი
0