თებერვლის მაგნიტური ქარიშხლების კალენდარი: მოემზადეთ ძლიერი და ხანგრძლივი შეტევებისთვის
14:52 30.01.2023 (განახლებულია: 20:56 30.01.2023)
გამოწერა
თბილისი, 30 იანვარი — Sputnik. თებერვალში დედამიწას რამდენიმე ძლიერი და გაჭიანურებული გეომაგნიტური ქარიშხალი ელოდება, ამასთან ზამთრის ბოლო თვე მზეზე აფეთქებით დაიწყება, რაც ჩვენი პლანეტის მაგნიტური ველის დარღვევას გამოიწვევს, ნათქვამია პორტალ Meteoagent-ზე.
პორტალი მოსალოდნელი გეომაგნიტური ქარიშხლების კალენდარს აქვეყნებს, რომელიც თანამგზავრული სისტემა NOAA-სა დაTESIS-ის მონაცემებზე დაყრდნობითაა შექმნილი მსოფლიოს საერთაშორისო მეტეოროლოგიურ ლაბორატორიებში.
2023 წლის თებერვლის მაგნიტური ქარიშხლების კალენდარი
1 თებერვალი — 4 ბალის სიმძლავრის ქარიშხალი, რომელიც 2 თებერვლისთვის 3 ბალამდე დაიწევს;
7-10 თებერვალი — 4 ბალის სიძლავრის ქარიშხალი. ოთხდღიანი შეტევის შემდეგ, ქარიშხალი 11 თებერვალს 2 ბალამდე შესუსტდება;
19-21 თებერვალი – მოსალოდნელია სამდღიანი გეომაგნიტური ქარიშხალი, რომლის სიმძლავრეც 4 ბალი იქნება.
ამის შემდეგ, ვიდრე თვის ბოლომდე, ქარიშხლის სიმძლავრე 2-3 ბალს არ ასცდება.
რა არის მაგნიტური ქარიშხლები?
ასტრონომების განმარტებით, მაგნიტური ქარიშხლები მზეზე აფეთქებების შედეგად წარმოიშვება. ამ დროს კოსმოსურ სივრცეში უზარმაზარი რაოდენობის პროტონები და ელექტრონები გაიტყორცნება. ისინი დედამიწას ერთ დღე-ღამეში აღწევს და მის მაგნიტურ ველს ცვლის.
რაც უფრო ძლიერია აფეთქება, მით უფრო დიდია გამოტყორცნილი ნაწილაკების ნაკადი და უფრო მაღალია დედამიწის მაგნიტური ველის ცვლილება.
მაგნიტური ქარიშხლები გავლენას ახდენს ცხოვრების ბევრ სფეროზე. დიდია შეფერხებების ალბათობა საკომუნიკაციო სისტემებისა და სანავიგაციო მოწყობილობების მუშაობაში.
გარდა ამისა, ის გავლენას ახდენს ადამიანის ჯანმრთელობაზე და განსაკუთრებით საშიშია მათთვის, ვისაც გულთან და წნევასთან დაკავშირებული პრობლემები აწუხებს. სტატისტიკის მიხედვით, მაგნიტური დარღვევების დღეებში ინფარქტისა და ინსულტის სიხშირე იზრდება.
აღსანიშნავია, რომ მაგნიტურ ქარიშხლებსა და ადამიანის ჯანმრთელობას შორის კავშირი ჯერ კიდევ 1930-იან წლებში შენიშნეს საფრანგეთში.
რეკომენდაციები ექიმებისგან
როგორ შევამსუბუქოთ მაგნიტური ქარიშხლების გავლენა ჯანმრთელობაზე:
დაწექით დასაძინებლად შეძლებისდაგვარად ადრე – ძილის დროს გამოყოფილი მელატონინი ეხმარება ორგანიზმს აღდგენაში და ასევე ნორმაში მოჰყავს სისხლის წნევა;
გაღვიძებისას კი (განსაკუთრებით ჰიპერტონიკები) არ უნდა წამოდგეთ საწოლიდან მკვეთრად;
კარგია კონტრასტული შხაპის მიღება – ოღონდ მხოლოდ იმ შემთხვევაში, თუ ამას თქვენი ჯანმრთელობისთვის უკუჩვენება არ აქვს;
დღის განმავლობაში ერთხელ მაინც უნდა გაისეირნოთ ჰაერზე, ან, უკიდურეს შემთხვევაში, რამდენჯერმე გაანიავოთ ოთახი – სუფთა ჰაერი დადებითად მოქმედებს გულ-სისხლძარღვთა სისტემაზე;
არ არის რეკომენდებული ალკოჰოლური სასმელებისა და ყავის მიღება, ასევე თამბაქოს მოწევა;
საუკეთესო მენიუ ასეთ დღეებში არის ხილი, ბოსტნეული, ფაფები, ქათმის მოხარშული ხორცი და თევზეული;
მიიღეთ ტკივილგამაყუჩებელი, დამამშვიდებელი და მატონიზირებელი პრეპარატები, რომლებიც ექიმის მიერ გაქვთ დანიშნული;
ნერვული აშლილობისას საუკეთესოა ნატურალური დამამშვიდებელი საშუალებების მიღება – კატაბალახას (ვალერიანი), ბარამბოსა თუ შავბალახას ნახარში ან ნაყენი;
კარგი იქნება, თუ სტრესს თავს აარიდებთ და სხვა დროისთვის გადადებთ მნიშვნელოვანი საკითხების გადაჭრას.
წყარო: Meteoagent
