ქართული ხაშის პოლონელი „ნათესავი“ - უგემრიელესი ფლაკი „საპახმელიოდ“: დეტალური რეცეპტი

© Pexels / Annushka Ahujaპოლონური ფლაკი
პოლონური ფლაკი - Sputnik საქართველო, 1920, 04.01.2023
გამოწერა
НовостиTelegram
საახალწლო სტუმრიანობა და ქეიფები ჯერ არ შეწყვეტილა და არც შემცირებულა — ალკოჰოლი ძველებურად გვარიანად ისმება და, შესაბამისად, ნაბახუსევის პრობლემაც უწინდებურად აქტუალურია. ამიტომაც გთავაზობთ შესანიშნავი „საპახმელიო“ კერძის რეცეპტს.
ფლაკი — ეს პოლონური სამზარეულოს სქელი და ნოყიერი წვნიანია, რომელიც კარგადაც გაგათბობთ ცივ ამინდში და, ჩვენებური ხაშისა არ იყოს, „პახმელიაზეც“ შესანიშნავად გამოგიყვანთ.
ეს იმიტომ, რომ ხაშივით სწორედაც რომ ფაშვისგან მზადდება, ოღონდ იმ განსხვავებით, რომ სხვა ინგრედიენტებიც ემატება.

ფლაკის მოსამზადებლად დაგჭირდებათ:

ძროხის ფაშვი — 700 გ;
ძროხის ბარკალი (ძვლებით) — 1 კგ;
ნიახურის ძირები — 150 გ;
სტაფილო — 300 გ;
ჯანჯაფილი — 1 ბოლქვი;
ხახვი — 1 თავი;
ფქვილი — 1,5-2 სუფრის კოვზი;
შავი და სურნელოვანი პილპილების მარცვლების ნარევი — 1 სუფრის კოვზი;
დაფნის ფოთოლი — 6 ცალი;
მარილი — გემოვნებით;
ზეითუნის ზეთი — 2 სუფრის კოვზი;
პაპრიკა (დაფქული წითელი ბულგარული წიწაკა) — 1 ჩაის კოვზი;
მაიორანი (დაფქული) — გემოვნებით (ბევრი არ სჭირდება).

მომზადების წესი

კარგად გაასუფთავეთ და გარეცხეთ ფაშვის ნაჭერი გამდინარე წყალში. მეტი ეფექტისთვის წმენდისას გამოიყენეთ ჯაგრისი;
დაჭერით გარეცხილი ფაშვი მომსხო ნაჭრებად;
ჩაყარეთ ქვაბში, დაასხით ცივი წყალი და მიიყვანეთ ადუღებამდე;
არ აცადოთ წამოდუღება, გადაღვარეთ ბულიონი და დაასხით ფაშვს ახალი წყალი. გაიმეორეთ წყლის გამოცვლის პროცედურა სამჯერ;
ამის შემდეგ გადმოდგით ქვაბი ცეცხლიდან და დააცადეთ ცოტა გაცივება;
ამოიღეთ ფაშვის ნაჭრები ბულიონიდან და დაჭერით წვრილ ზოლებად;
კვლავ ჩაყარეთ ქვაბში, დაასხით ცივი წყალი და ჩააყარეთ მარცვლოვანი წიწაკების ნარევი, დაფნის ფოთლები (2 ცალი) და ჯანჯაფილის მომცრო ნაჭრები. დადგით ნელ ცეცხლზე და ხარშეთ დაახლოებით 3-3,5 საათი.
სანამ ფაშვი იხარშება, ჩააწყვეთ სხვა ქვაბში ბარკლის ნაჭრები, დაამატეთ დაფქული წიწაკა, დაფნის ფოთლები (2 ცალი) და კარგად მოხარშეთ დაბალ ცეცხლზე. ამას დაახლოებით 1-1,5 საათი დასჭირდება. სხვათა შორის, შეგიძლიათ გამოიყენოთ მარტო ძვლების ნახარში, მაგრამ ხორცისა და ძვლების ბულიონი უფრო ნოყიერი გამოვა.
ამის შემდეგ ამოიღეთ მოხარშული ხორცი ბულიონიდან, გამოათავისუფლეთ ძვლებისგან და დაჭერით მომცრო ნაჭრებად; ხოლო სტაფილო, ნიახურის ძირები და ჯანჯაფილი — წვრილ, მოგრძო ნაჭრებად;
ჩაყარეთ დაჭრილი ხორცი, სტაფილო, ნიახური, ჯანჯაფილი და უკვე მოხარშული ფაშვის ნაჭრები მდუღარე ბულიონში;
სანამ ეს ყველაფერი ერთად იხარშება, მოამზადეთ სოუსი:
გახურებულ ტაფაზე დაასხით ზეითუნის ზეთი (გნებავთ, ღორის ქონი) და დაყარეთ ზედ წვრილად დაჭრილი ხახვი. მოშუშეთ ოდნავ – სანამ ოქროსფერს არ მიიღებს;
დაამატეთ ხახვს დაფქული პაპრიკა და სწრაფად მოურიეთ;
თითქმის მაშინვე დაამატეთ ფქვილი, მოურიეთ და შუშეთ დაახლოებით ერთი წუთი;
ამის შემდეგ დაასხით ცოტა ბულიონი და დააყარეთ ერთი მწიკვი მარილი. მოურიეთ და ხარშეთ შესქელებამდე.
როცა შესქელდება, ჩაუშვით სოუსი ხორცთან და ფაშვთან, სწრაფად მოურიეთ, რომ კორკოშელები არ გაიკეთოს, დაუწიეთ ცეცხლს და ხარშეთ 5 წუთის განმავლობაში.
ამის შემდეგ ჩაყარეთ ქვაბში დაფნის ფოთოლი, მაიორანი და მარილი გემოვნებით.
და, მორჩა, თქვენი ფლაკი მზადაა. სუფრაზე შეგიძლიათ მიიტანოთ დაჭრილ მწვანილთან და ნიორთან ერთად — ისე, როგორც ჩვენებური ხაში.
გემრიელად მიირთვით!
ყველა ახალი ამბავი
0