კონტროლი წამლების ფასებზე და ახალი ჯარიმები - კანონი მიღებულია

© photo: Sputnik / Stringerაფთიაქი
აფთიაქი - Sputnik საქართველო, 1920, 01.12.2022
გამოწერა
НовостиTelegram
ახალი კანონით, მედიკამენტების რეალიზაცია ზღვრულზე მაღალ ფასად აკრძალულია.
თბილისი, 1 დეკემბერი – Sputnik. საქართველოს პარლამენტმა მესამე მოსმენით მიიღო კანონპროექტი „წამლისა და ფარმაცევტული საქმიანობის შესახებ“ საქართველოს კანონში ცვლილებების შეტანის თაობაზე“, რომელთა მიხედვითაც მედიკამენტებზე ზღვრული ფასები წესდება, ხოლო დამრღვევებისთვის ახალი სანქციებია გათვალისწინებული.
პარლამენტმა ცვლილებები 75 ხმით ერთის წინააღმდეგ დაამტკიცა. ახალი რეგულაციები ძალაში 2023 წლის 1 იანვარს შევა.
ცვლილებების თანახმად, კანონში გაჩნდა ტერმინები „რეფერენტული საბითუმო ფასი“ და „რეფერენტული საცალო ფასი“.
აზარაშვილი: მედიკამენტების ფასების რეგულირება ბაზრის წმენდას არ ისახავს მიზნად >>
რეფერენტული ფასის ქვეშ იგულისხმება მაქსიმალური ფასის ზღვარი ლარში, ფასნამატთან ერთად. ფასებს საქართველოს ჯანდაცვის სამინისტრო საცალო და საბითუმო ვაჭრობისთვის ცალ-ცალკე დაადგენს.
შეიქმნება რეფერენტული ფასების კატალოგი, რომელიც გამოქვეყნდება საქართველოს ჯანდაცვის სამინისტროს ვებ-გვერდზე.
კანონი კრძალავს მედიკამენტების დადგენილზე მაღალ ფასად რეალიზაციას, თუმცა მომწოდებლებს საშუალებას აძლევს წამლის პირველადი მარკირების ან შეფუთვის ცვლილების შემთხვევაში მედიკამენტები შემოიტანონ და გაყიდონ ორივე ტიპის შეფუთვით 12 თვის განმავლობაში.
პირველ ეტაპზე რეფერენტული ფასები ქრონიკული და ონკოლოგიური დაავადებების სამკურნალო პრეპარატებზე დაწესდება – ეს დაახლოებით 1100 დასახელებაა. მომდევნო წლის ბოლომდე კი ფასების რეგულირების მექანიზმი დანარჩენ მედიკამენტებზეც გავრცელდება.
ფარმაცევტული პროდუქტის რეფერენტულ საცალო ფასზე მაღალ ფასად რეალიზაციის წესის დარღვევა გამოიწვევს გაფრთხილებას (აფთიაქისთვის), თუ იგივე ქმედება ჩადენილი იქნება განმეორებით – დაჯარიმებას 5 ათასი ლარის ოდენობით.
ასევე ფარმაცევტული პროდუქტის რეფერენტულ საბითუმო ფასზე მაღალ ფასად რეალიზაციის წესის დარღვევა გამოიწვევს დაჯარიმებას 22.500 ლარის ოდენობით. თუ იგივე ქმედება ჩადენილი იქნება განმეორებით – 45 ათასი ლარის ოდენობით.
ფარმაცევტული პროდუქტის მიმოქცევის შესახებ ინფორმაციის/დოკუმენტის ხელმისაწვდომობის წესის დარღვევა გამოიწვევს გაფრთხილებას. თუ იგივე ქმედება ჩადენილი იქნება განმეორებით, გამოიწვევს დაჯარიმებას 5 ათასი ლარის ოდენობით.
ამავე პროექტით, ფარმაცევტული პროდუქტის წარმოება საქართველოს ნაციონალური GMP (კარგი საწარმოო პრაქტიკა) სერტიფიკატის გარეშე გამოიწვევს დაჯარიმებას 50 ათასი ლარის ოდენობით, სამართალდარღვევის საგნის კონფისკაციით, განმეორების შემთხვევაში კი ჯარიმა გაორმაგდება.
გარდა ამისა, ფარმაცევტული პროდუქტის საბითუმო დისტრიბუცია საქართველოს ნაციონალური GDP (კარგი სადისტრუბუციო პრაქტიკა) სერტიფიკატის ფლობის გარეშე გამოიწვევს დაჯარიმებას 30 ათასი ლარის ოდენობით, სამართალდარღვევის საგნის კონფისკაციით, განმეორების შემთხვევაში დარღვევა გაორმაგდება.
გარდა ამისა, კანონპროექტის მიხედვით, ფარმაცევტული პროდუქტის რეალიზაციის დაწყება და დასრულება სააგენტოსთვის სავალდებულო შეტყობინების გარეშე გამოიწვევს დაჯარიმებას 4 ათასი ლარის ოდენობით. თუ იგივე ქმედება ჩადენილი იქნება განმეორებით, ჯარიმა 8 ათას ლარს შეადგენს.
ყველა ახალი ამბავი
0