აფეთქება თბილისში: როგორია დაშავებულების ჯანმრთელობის მდგომარეობა

© photo: Sputnik / Stringer სასწრაფო დახმარება
 სასწრაფო დახმარება - Sputnik საქართველო, 1920, 22.10.2022
გამოწერა
НовостиTelegram
ერთ-ერთი დაშავებულის დის ინფორმაციით, მის ძმას ორივე კიდური და ხერხემალი აქვს დაზიანებული.
თბილისი, 22 ოქტომბერი - Sputnik. თბილისში, ლაღიძის ქუჩაზე მომხდარი აფეთქების შედეგად დაშავებული სამი ადამიანიდან ორი მათგანი ინგოროყვას კლინიკაშია მოთავსებული, ხოლო მესამე - ამერიკულ ჰოსპიტალში.
ქუთათელაძისა და ლაღიძის ქუჩის კუთხეში აფეთქების ხმა დღეს დაახლოებით 11 საათზე გაისმა. მედიაში გავრცელებული ინფორმაციით, აფეთქებას წინ ორ მამაკაცს შორის დაპირისპირება უძღოდა, რა დროსაც ერთ-ერთმა მათგანმა სავარაუდოდ ხელყუმბარა ააფეთქა. შედეგად დაშავდა სამი ადამიანი, რომელთაგანაც ერთ-ერთი შემთხვევითი გამვლელი იყო.
როგორც ინგოროყვას კლინიკაში აცხადებენ, მათთან მოთავსებული დაშავებულების სიცოცხლეს საფრთხე არ ემუქრება.
ერთ-ერთი დაშავებულის დის ინფორმაციით, მის ძმას ორივე კიდური და ხერხემალი აქვს დაზიანებული.
„ჩემს ძმას დღეს დაბადების დღე ჰქონდა და საყიდლებზე იყო გასული. რა ვითარებაში მოხდა ინციდენტი, არ ვიცი“, – განაცხადა ერთ-ერთი დაშავებული დამ.
რაც შეეხება მესამე დაშავებულს, რომელიც ამერიკულ ჰოსპიტალში იმყოფება, ის კონკრეტული სერვისის საჭიროების გამო, სხვა კლინიკაში უნდა გადაიყვანონ.
თბილისის ცენტრში აფეთქება მოხდა >>
ამ დროისთვის უცნობია, დაკავებულია თუ არა დამნაშავე. ასევე უცნობია, მონაწილეობდნენ თუ არა დაშავებულები ინციდენტში. შემთხვევის ადგილზე ამ დრომდე მუშაობენ კრიმინალისტები. გარდა ამისა, ინციდენტის ადგილის სიახლოვეს, თაბუკაშვილის ქუჩაზე დაცხრილული ავტომობილია ნაპოვნი.
შსს-ს ინფორმაციით, გამოძიება სისხლის სამართლის კოდექსის 19-109 და 236-ე მუხლებით დაიწყო, რაც ორ ან ორ პირზე მეტის განზრახ მკვლელობის მცდელობას და საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა, შენახვა, ტარება, დამზადება, გადაზიდვა, გადაგზავნა ან გასაღებას გულისხმობს.
ყველა ახალი ამბავი
0