ჩემი შვილი რომ იყოს, ყოველდღე არ ვეტყოდი, რომ საუკეთესოა - სანიოლი კვარაცხელიაზე

© photo: Sputnik / Maksim Bogodvid / გადასვლა მედიაბანკშიხვიჩა კვარაცხელია
ხვიჩა კვარაცხელია - Sputnik საქართველო, 1920, 15.09.2022
გამოწერა
НовостиTelegram
ლუჩანო სპალეტი ხვიჩა კვარაცხელიას თამაშის ხარისხის გაუმჯობესებაში დაეხმარება, აღნიშნა ვილი სანიოლმა.
თბილისი, 15 სექტემბერი – Sputnik. საქართველოს ფეხბურთის ნაკრების მთავარი მწვრთნელი ვილი სანიოლი ხვიჩა კვარაცხელიას გარშემო შექმნილ აჟიოტაჟსა და „ნაპოლის“ თავკაცის ლუჩანო სპალეტის განცხადებას გამოეხმაურა.
გუშინ ჩემპიონთა ლიგის ჯგუფური ეტაპის მეორე ტურში „ნაპოლი“ შოტლანდიურ „რეინჯერსს“ ესტუმრა და სამბურთიანი სხვაობით, ანგარიშით 3:0 დაამარცხა. აღსანიშნავია, რომ ნეაპოლელებმა პირველი გოლი სწორედ ქართველი შემტევის აქტიურობის შემდეგ გაიტანეს, კვარაცხელიამ თერთმეტმეტრიანის გამომუშავება მოახერხა. მიუხედავად კვარაცხელიას პროდუქტიულობისა, იტალიელმა მწვრთნელმა ლუჩანო სპალეტიმ ქართველი ფეხბურთელი გააკრიტიკა.
უეფას ერთა ლიგის მატჩების წინ გამართულ პრესკონფერენციაზე საუბრისას საქართველოს ნაკრების თავკაცმა ვილი სანიოლმა აღნიშნა, რომ სპალეტი კვარაცხელიასთან მიმართებაში სწორ განცხადებებს აკეთებს და ქართველ ფეხბურთელს ბევრი აქვს დასამტკიცებელი.

„ხვიჩაზე ბევრს არაფერს ვიტყვი, ეს აჟიოტაჟიც გასაგებია. ჩემი შვილი რომ იყოს, მას ყოველდღე არ ვეტყოდი, რომ ის საუკეთესოა. ჩვენ მასთან დაკავშირებით გარკვეული ბალანსი უნდა დავიცვათ. კვარას პროგრესი მიხარია, მაგრამ ჯერ მაქსიმუმისთვის არ მიუღწევია და მას ყველა ერთად უნდა დავეხმაროთ მაქსიმუმის მიღწევაში. სპალეტის სიტყვები კი იმას ემსახურება, რომ კვარა მომავალში უფრო კარგი იყოს“, – განაცხადა სანიოლმა.

ვილი სანიოლმა ასევე აღნიშნა, რომ ლუჩანო სპალეტი გამოცდილი სპეციალისტია და ის კვარაცხელიას თამაშის ხარისხის გაუმჯობესებაში დაეხმარება.
ერთა ლიგის გათამაშებაში ოთხი ტურის შემდეგ საქართველოს ნაკრები C დივიზიონის მე-4 ჯგუფის სატურნირო ცხრილში 10 ქულით ლიდერობს.
საქართველოს ნაკრების 21 წლის შემტევმა აპრილში „ნაპოლისთან“ 5-წლიანი კონტრაქტი გააფორმა. ხვიჩა კვარაცხელია მესამე ქართველი ფეხბურთელია კახა კალაძისა და ლევან მჭედლიძის შემდეგ, რომელიც იტალიის სერია A-ში ასპარეზობს.
აღსანიშნავია, რომ იტალიის ფეხბურთის ასოციაციამ კვარაცხელია სერია A-ში აგვისტოს თვის საუკეთესო ფეხბურთელად დაასახელა.
ყველა ახალი ამბავი
0