ბორჯომის მუნიციპალიტეტში ცეცხლის ახალი კერები გაჩნდა

© photo: Sputnik / Stringerხანძარი ბორჯომის ხეობაში
ხანძარი ბორჯომის ხეობაში - Sputnik საქართველო, 1920, 23.08.2022
გამოწერა
ხანძრის ლოკალიზება ჯერჯერობით ვერ ხერხდება - ძლიერი ქარი ახალ კერებს აღვივებს
თბილისი, 23 აგვისტო - Sputnik. ბორჯომის მუნიციპალიტეტის ტყეში ხანძრის ახალი კერები გაჩნდა, ხეობაში კრიტიკული ვითარებაა, იუწყება ტელეკომპანია „რუსთავი2“.
ტელეკომპანიის ინფორმაციით, მაღალი ტემპერატურისა და ძლიერი ქარის შედეგად, ცეცხლის ქრობა გართულებულია.
ცეცხლი მდინარე მტკვრის მარჯვენა სანაპიროზე, სოფელ ქვაბისხევის ტყეში 19 აგვისტოს გაჩნდა. კლდოვანი და მიუწვდომელი რელიეფი ხანძრის ჩაქრობის პროცესს ართულებს.
შსს-ს ინფორმაციით, ხანძრის სალიკვიდაციო სამუშაოები უწყვეტ რეჟიმში მიმდინარეობს. ხანძრის ქრობის ოპერაციის რაიონი სამ სექტორადაა დაყოფილი. სამივე სექტორზე აქტიური სალოკალიზაციო და სალიკვიდაციო სამუშაოები ხორციელდება. ინტენსიურად კეთდება კერებამდე მისასვლელები მძიმე ტექნიკისა და ტრაქტორების მეშვეობით.
ამ დროისთვის სხვადასხვა სამუშაოში ჩართულია დაახლოებით 1.200 ადამიანი. ხანძრის ქრობის ღონისძიებებში მონაწილეობს 300 მეხანძრე-მაშველი და განსაკუთრებულ დავალებათა დეპარტამენტის 300 თანამშრომელი. ცეცხლის ქრობის პროცესში კვლავ ჩართული არიან სასაზღვრო პოლიციის ვერტმფრენები და მობილიზებულია შესაბამისი სახანძრო-სამაშველო ავტოტექნიკა. დრონებით ხდება ხანძრის მონიტორინგი.
ადგილზე მოქმედებს ოპერატიული მართვის შტაბი, რომელსაც შინაგან საქმეთა მინისტრის მოადგილე იოსებ ჭელიძე და საგანგებო სიტუაციების მართვის სამსახურის უფროსი თემურ მღებრიშვილი ხელმძღვანელობენ.
წყარო - ტელეკომპანია „რუსთავი2“, შსს
ყველა ახალი ამბავი
0