ოჯახური ძალადობა ბავშვზე: 13 წლის გოგონა თავშესაფარშია გადაყვანილი

  - Sputnik საქართველო, 1920, 31.07.2022
გამოწერა
Yandex newsTelegram
გოგონას ოჯახი საქალწულე აპკის მთლიანობის შემოწმებას აიძულებდა
თბილისი, 31 ივლისი – Sputnik. 13 წლის გოგონა, რომელიც ოჯახში ფიზიკური და ფსიქოლოგიური ძალადობის მსხვერპლი იყო, სამართალდამცველებმა თავშესაფარში გადაიყვანეს, ინფორმაციას არასამთავრობო ორგანიზაცია „ფემინა“ ავრცელებს.
ორგანიზაციის ცნობით, თბილისში მცხოვრებ არასრულწლოვანს აიძულებდნენ, წაჰყოლოდა ოჯახს საქალწულე აპკის მთლიანობის შესამოწმებლად, რის გამოც დაახლოებით ერთი თვის წინ არასრულწლოვანმა დახმარებისთვის მეგობარს და მის სრულწლოვან დას მიმართა.
„ამ საქმეში არნახული გამბედაობა და სამოქალაქო პასუხისმგებლობა გამოიჩინა მოწმე თ. რ-მ, რომელსაც მოძალადეები საცხოვრებელ სახლში მიეჭრნენ და ფიზიკურად დაუპირისპირდნენ“, — აღნიშნავენ არასამთავრობო ორგანიზაციაში.
ფაქტის საფუძველზე გამოიცა შემაკავებელი ორდერი როგორც არასრულწლოვანის დასაცავად, ისე საქმის მთავარი მოწმის უსაფრთხოების დაცვის მიზნით.
როგორც „ფემინა“ წერს, მოძალადე ოჯახის წევრებმა ორდერი გაასაჩივრეს. სასამართლოზე მათი ადვოკატები არასრულწლოვანი გოგონას დისკრედიტაციას ცდილობდნენ და აცხადებდნენ, რომ ის ყველაფერს იგონებდა. გარდა ამისა, აფიქსირებდნენ მოსაზრებას, რომ ჭიპის გამოჩენის გამო შეიძლება არასრულწლოვანს ძალადობით დაემუქრო, ხოლო სიჯიუტის გამოვლენისას ძალადობრივი მეთოდები გამოიყენო.
მიუხედავად მოძალადე ოჯახისა და მათი ადვოკატების მცდელობისა, მოსამართლემ არასრულწლოვანი გოგონას ადვოკატების დასაბუთებული პოზიცია გაიაზიარა და შემაკავებელ ორდერი ძალაში დატოვა.
არასრულწლოვნის ინტერესებს ადვოკატი ელისო რუხაძე იცავს (არასამთავრობო ორგანიზაციიდან „უფლებები საქართველო“.
ყველა ახალი ამბავი
0