საქართველოში სამაგისტრო გამოცდები დაიწყო

© photo: Sputnik / Fuad Gasanov
  - Sputnik საქართველო, 1920, 27.07.2022
გამოწერა
საგამაგისტრო გამოცდები ორ დღეს გასტანს და 27 ივლისს დასრულდება.
თბილისი, 27 ივლისი – Sputnik. საქართველოში დღეს და ხვალ საერთო სამაგისტრო გამოცდები ტარდება. ინფორმაციას შეფასების და გამოცდების ეროვნული ცენტრი ავრცელებს.
ტესტირება ორი დღის განმავლობაში ჩატარდება. პირველ დღეს გამოცდა წაკითხულის გააზრებისა და ანალიტიკური წერის ნაწილებში ტარდება, მეორე დღეს კი – ლოგიკურ და რაოდენობრივ მსჯელობაში. გამოცდის ხანგრძლივობა 2 საათი და 25 წუთია.

„საგამოცდო ტესტი შედგება ოთხი ნაწილისგან და ნებისმიერ სამ ნაწილში ზღვრის გადალახვის შემთხვევაში გამოსაცდელს საერთო სამაგისტრო გამოცდა წარმატებით ჩაბარებულად ეთვლება. დეტალური ინფორმაცია მითითებულია გზამკვლევში, რომელიც შეფასებისა და გამოცდების ეროვნული ცენტრის ოფიციალურ ვებ-გვერდზეა გამოქვეყნებული“, – აღნიშნულია ინფორმაციაში.

გამოცდაზე დასასწრებად მაგისტრანტობის კანდიდატმა თან უნდა იქონიოს პირადობის დამადასტურებელი მოწმობა ან პასპორტი და საგამოცდო ბარათი. 27 ივლისს საერთო სამაგისტრო გამოცდით 2022 წლის საგამოცდო პროცესის ძირითადი სესიები დასრულდება.
„შეფასებისა და გამოცდების ეროვნული ცენტრი კიდევ ერთხელ შეახსენებს ყველა მონაწილეს, არ დაიგვიანონ და გამოცდაზე ბარათზე მითითებულ დროსა და ადგილზე გამოცხადდნენ“, – ნათქვამია შეფასების და გამოცდების ეროვნული ცენტრის ინფორმაციაში.
გასული წლის მსგავსად, წელსაც იმ გამოსაცდელებისთვის, რომლებიც კორონავირუსის დადასტურების გამო გამოცდებზე გასვლას ვერ შეძლებენ, დამატებითი საგამოცდო სესია დაინიშნება.
დამატებით სესიებთან დაკავშირებით ინფორმაცია ეტაპობრივად გამოქვეყნდება ვებ-გვერდზე: www.naec.ge.
ყველა ახალი ამბავი
0