როდის დასრულდება მეტეხის ხიდის რეაბილიტაცია: კალაძის განმარტება

© Sputnik / Alexander Imedashviliმეტეხის ხიდი
მეტეხის ხიდი - Sputnik საქართველო, 1920, 06.07.2022
გამოწერა
მეტეხის ხიდის სარეაბილიტაციო სამუშაოებს კომპანია „ბესკო" ასრულებს. პროექტის ღირებულება დაახლოებით 2 მლნ ლარს შეადგენს.
თბილისი, 6 ივლისი — Sputnik. მეტეხის ხიდის სარეაბილიტაციო სამუშაოები მიმდინარე წლის სექტემბრის თვეში დასრულდება, განაცხადა დედაქალაქის მერმა კახა კალაძემ დღეს მუნიციპალიტეტის მთავრობის სხდომაზე.
მეტეხის ხიდის სარემონტო სამუშაოები მიმდინარე წლის აპრილში დაიწყო. პირველი ეტაპი უკვე დასრულდა და გარემონტებულ ნაწილში საავტომობილო მოძრაობა აღდგა.

„როდესაც ჩვენ ეს პროექტი დავიწყეთ, გზის სავალი ნაწილი გავყავით და ერთ მხარეს გადაადგილების შესაძლებლობა დავტოვეთ. მეორე მხარეს, სადაც სამუშაოები მიმდინარეობდა, ფაქტობრივად ყველაფერი მოწესრიგდა“, – განაცხადა კალაძემ.

მისი თქმით, უკვე დაგებულია ასფალტ-ბეტონის საფარის ქვედა ფენა, შეიცვალა ფილები და მთლიანად გარემონტდა მოაჯირები. ასევე ეწყობა სანიაღვრე სისტემა, რათა წვიმამ ხიდზე პრობლემები არ შექმნას.
„ამ ეტაპზე მოძრაობა გადაერთო გზის მეორე მხარეს. ეს სივრცეც მოწესრიგდება და პროექტი სექტემბერში მთლიანად დასრულდება“, – განაცხადა კალაძემ.
პროექტის მეორე ეტაპის ფარგლებში გზის სავალი ნაწილის ქვემოთ საიზოლაციო დამცავი ფენები მოეწყობა. ასევე დაიგება ასფალტ-ბეტონის საფარი, განახლდება და ბუნებრივი ქვის ფილებით მოპირკეთდება ტროტუარი. გარდა ამისა, გამაგრდება ფასადები და თაღები, ხოლო ხიდზე არსებული თუჯის მოაჯირები იერსახის უცვლელად განახლდება.
დაგეგმილი სამუშაოების გამო საავტომობილო მოძრაობა გზის სავალი ნაწილის ერთ მხარეს შეიზღუდება.
მეტეხის ხიდის სარეაბილიტაციო სამუშაოებს კომპანია „ბესკო" ასრულებს. პროექტის ღირებულება დაახლოებით 2 მლნ ლარს შეადგენს.
ყველა ახალი ამბავი
0