დამწვრობის ცენტრის ხელმძღვანელმა რუჯის მოყვარულები გააფრთხილა

© AP Photo / Owen Humphreys / PAგოგონები პლაჟზე ირუჯებიან
გოგონები პლაჟზე ირუჯებიან - Sputnik საქართველო, 1920, 22.05.2022
გამოწერა
НовостиTelegram
საქართველოში ლეღვის ფოთლების ნახარშის გამოყენებით მზის აბაზანის მიღების შემთხვევები 2011 წლიდან ფიქსირდება, ყოველი მათგანი ჰოსპიტალიზებით მთავრდება.
თბილისი, 22 მაისი – Sputnik. დამწვრობის ცენტრში იმედოვნებენ, რომ წელს ლეღვის ფოთლების ნახარშით დამწვრობის შემთხვევა აღარ იქნება, აღნიშნა ცენტრის ხელმძღვანელმა გუგა ქაშიბაძემ ტელეკომპანია „იმედის“ ეთერში.
საქართველოში მსგავსი მეთოდით მზის აბაზანის მიღების პრაქტიკა 2011 წლიდან გახდა „პოპულარული". აღსანიშნავია, რომ თოთოეული შემთხვევა ჰოსპიტალიზებით სრულდებოდა. ლეღვის ფოთლის ნახარშით მიღებული დამწვრობის ფაქტები მასმედიაში ფართოდ შუქდებოდა, თუმცა ამის მიუხედავად ამ ნახარშით რუჯის მიღება მაინც ხდებოდა.
„ძალიან დიდი იმედი გვაქვს, რომ წელს ლეღვის ფოთლების ნახარშით დამწვრობის შემთხვევა აღარ იქნება. ლეღვის ფოთლების ნახარში და რუჯი ერთმანეთთან საერთოდ არ არის კავშირში. მინდა, ხაზი გავუსვა, რომ ამ ნახარშის გამოყენება და დამწვრობის მიღება ერთი და იგივეა. რუჯის ეფექტს ვერანაირად ვერ მივიღებთ“, - აღნიშნა დამწვრობის ცენტრის ხელმძღვანელმა.
მისივე თქმით, მეცნიერები თანხმდებიან, რომ უსაფრთხო რუჯი არ არსებობს და რომ ნებისმიერი რუჯი კანს გარკვეულწილად აზიანებს.
საქართველოში გარუჯვა ძალიან პოპულარულია. ზაფხულში დედაქალაქში არსებული ყველა ღია აუზი, თბილისის ზღვის, ლისის და კუს ტბის სანაპიროები რუჯის მოყვარულებითაა სავსე.
აღსანიშნავია, რომ ქართველი ქალბატონები საკუთარ რეცეპტებს იგონებენ ლამაზი რუჯის მისაღებად, რომელთა შორის, გარდა ლეღვის ფოთლების ნახარშისა, ასევე გვხვდება სხვადასხვა სახის კოქტეილები — ლუდის, კოკა-კოლის, ყავის, სოდისა და სტაფილოს შემცველობით. მათ გამოყენებას ხშირ შემთხვევაში შედეგად მეორე და მესამე ხარისხის დამწვრობა მოაქვს.
ყველა ახალი ამბავი
0