საჩხერის მუნიციპალიტეტში კვერეთის აღკვეთილი დაარსდება

© courtesy of On the trails of Georgiaსაჩხერე. მოდიმნახეს ციხე
საჩხერე. მოდიმნახეს ციხე - Sputnik საქართველო, 1920, 15.05.2022
გამოწერა
Yandex newsTelegram
კვერეთის აღკვეთილის შექმნა ხელს შეუწყობს რეგიონის პოპულარიზაციას ეროვნულ და საერთაშორისო დონეზე, ტურისტული ნაკადის მოზიდვას, ადგილობრივი მოსახლეობისთვის კი შესაძლებელი გახდება დამატებითი ეკონომიკური სარგებლის მიღება.
თბილისი, 15 მაისი - Sputnik. საჩხერის მუნიციპალიტეტის ტერიტორიაზე, რაჭის ქედის სამხრეთ მონაკვეთზე დაცული ტერიტორიის ერთ-ერთი კატეგორიის – აღკვეთილის შექმნა იგეგმება.
შესაბამისი ცვლილებები პარლამენტის ბიუროს ხვალ სხდომაზე წარედგინება. პროექტის ინიციატორი მთავრობაა.
აღკვეთილის ტერიტორიის საერთო ფართობი 14.797 ჰექტარს შეადგენს. კანონპროექტის მიხედვით, კვერეთის აღკვეთილი იქმნება ეროვნული მნიშვნელობის მქონე ცოცხალი ორგანიზმების ველური სახეობების, სახეობათა ჯგუფების, ბიოცენოზებისა და არაორგანული ბუნების წარმონაქმნების შესანარჩუნებლად საჭირო ბუნებრივი პირობების დაცვის, აგრეთვე კანონით დადგენილი საზღვრების ფარგლებში არსებული ბუნებრივი ეკოსისტემებისა და ბიოლოგიური მრავალფეროვნების აღდგენის და დაცვის ხელშეწყობის მიზნით.
როგორც პროექტშია აღნიშნული, ტერიტორიაზე გვხდება საქართველოს წითელი ნუსხით დაცული ძუძუმწოვრები, დათვი, ფოცხვერი, წავი, იშვიათად კავკასიური ირემი და არჩვი. ასევე, აღნიშნულ ტერიტორიაზე წარმოდგენილია მდინარე ჯრუჭულასა და მდინარე ჩიხურას ხეობაში არსებული არაორგანული ბუნებრივი წარმონაქმნები.
კანონპროექტის ავტორების განმარტებით, ორგანული და არაორგანული კომპლექსის ბუნებრივი სახით შენარჩუნებას ესაჭიროება სპეციალური აღდგენითი და მოვლითი ღონისძიებების განხორციელება. აღკვეთილის სტატუსიდან გამომდინარე, მის გარშემო მცხოვრები ადგილობრივი მოსახლეობის ინტერესების გათვალისწინებით კი დაშვებული იქნება ცალკეული განახლებადი ბუნებრივი რესურსის მოხმარება.
„შესაბამისად, ახალი დაცული ტერიტორიის შექმნა ხელს შეუწყობს ზემოაღნიშნული ბიომრავალფეროვნების დაცვას და შენარჩუნებას, ბუნებრივი რესურსების ლიმიტირებულ და მდგრად სარგებლობას, ეკოტურისტული პოტენციალის განვითარებას“, – ნათქვამია პროექტში.
კანონპროექტის ძალაში შესვლის თარიღად 2023 წლის 1 იანვარი სახელდება. ამ ვადაში შეიქმნება კვერეთის აღკვეთილის ადმინისტრაცია, სადაც 23 საშტატო ერთეული იქნება გათვალისწინებული.
დღეს საქართველოში 5 სხვადასხვა კატეგორიის 94 დაცული ტერიტორიაა.
ბოლო ათი წლის განმავლობაში, დაცული ტერიტორიების ფართობი თითქმის 300 ათასი ჰექტრით გაიზარდა და 2021 წლის მდგომარეობით, დაახლოებით 800 ათას ჰექტარს შეადგენს, რაც ქვეყნის ტერიტორიის 11,5%-ია. 2012-2021 წლებში შეიქმნა 31 ახალი და გაფართოვდა 3 დაცული ტერიტორია.
ყველა ახალი ამბავი
0