იუსტიციის სამინისტრო მოუწოდებს სააკაშვილს კლინიკაში მკურნალობას დათანხმდეს

© photo: Sputnik / Stringerსააკაშვილის მხარდამჭერ აქციაზე
სააკაშვილის მხარდამჭერ აქციაზე - Sputnik საქართველო, 1920, 11.05.2022
გამოწერა
Yandex newsTelegram
საქართველოს მესამე პრეზიდენტ მიხეილ სააკაშვილის პასუხი იუსტიციის სამინისტროში შეაფასეს როგორც ულტიმატუმი.
თბილისი, 11 მაისი – Sputnik. საქართველოს იუსტიციის სამინისტრომ მსჯავრდებულ მიხეილ სააკაშვილს მოუწოდა ისარგებლოს შეთავაზებით სამოქალაქო კლინიკა „ვივამედში“ გამოსაკვლევად და საჭიროების შემთხვევაში სამკურნალოდ გადაყვანის თაობაზე.
აღნიშნული შეთავაზება მინისტრმა რატი ბრეგაძემ გუშინ გააჟღერა. სააკაშვილი დათანხმდა აღნიშნულ კლინიკაში ეტაპირებას, რომელიც პენიტენციურ სისტემას ემსახურება, მხოლოდ იმ პირობით, რომ მასთან მუდმივად შეუშვებენ ოჯახის წევრებს, მის პირად ექიმს ნიკოლოზ ყიფშიძეს და ცენტრ „ემპათიის“ ექიმებს , ასევე დეპუტატებსა და ადვოკატებს სამუშაო საათებში.
„კიდევ ერთხელ მოვუწოდებთ მსჯავრდებულ მიხეილ სააკაშვილს, მისივე ინტერესებიდან გამომდინარე, ისარგებლოს მისი ჯანმრთელობის დაცვისკენ მიმართული შეთავაზებული სამედიცინო მომსახურებით დათქმების გარეშე“, - ნათქვამია განცხადებაში.
სამინისტროში აღნიშნეს, რომ ექს-პრეზიდენტის სამოქალაქო კლინიკაში ეტაპირების წინადადება პენიტენციური სამსახურის მხრიდან გაკეთდა მსჯავრდებულის ჯანმრთელობის მდგომარეობის გაუარესების რისკების მინიმიზაციის მიზნით. იუსტიციის სამინისტრომ არაერთხელ განაცხდა, რომ სააკაშვილი უარს აცხადებს მედიკამენტების ნაწილის მიღებაზე.
„სამედიცინო ღონისძიებების განხორციელებას ესაჭიროება პირის ინფორმირებული თანხმობა, რომლის ნაცვლადაც საზოგადოებამ იხილა ულტიმატუმის ტოლფასი თანხმობა“, - ნათქვამია განცხადებაში.
განცხადებაში ასევე აღნიშნულია, რომ იუსტიციის სამინისტრო და მის სისტემაში შემავალი სპეციალური პენიტენციური სამსახური სრულ ნდობას უცხადებს საქართველოში ლიცენზირებულ სამედიცინო დაწესებულებებს და იქ მომუშავე მედპერსონალს, რომელიც ყოველთვის ზრუნავს ადამიანების ჯანმრთელობასა და სიცოცხლეზე.
„ექიმების მიმართ უსაფუძვლო უნდობლობის გამოხატვა და შეუთანხმებლად მათ საქმიანობაში ჩარევის მცდელობა აჭიანურებს და ხელს უშლის ჯანმრთელობისათვის საჭირო სამედიცინო ღონისძიებების განხორციელებას“, - ნათქვამია განცხადებაში.
უწყებაში ასევე აღნიშნეს,რომ პენიტენციური სამსახურის თანამშრომლები, სამედიცინო დახმარების აღმოჩენის პარალელურად, 24-საათიან რეჟიმში ახორციელებენ სხვადასხვა ღონისძიებებს პატიმრის უსაფრთხოების უზრუნველსაყოფად.
ნებისმიერი გადაწყვეტილება მიიღება ამ ორი სიკეთის გონივრული ბალანსის საფუძველზე, აღნიშნულია განცხადებაში.
რაც შეეხება მსჯავრდებულთან მნახველების დაშვებას, სამინისტროში განაცხადეს, რომ მათი დაშვება უზრუნველყოფილი იქნება კანონმდებლობის და სამედიცინო პერსონალის რეკომენდაციების შესაბამისად.
სამინისტრო კიდევ ერთხელ მოუწოდებს პოლიტიკურად ანგაჟირებულ პირებს, თავი შეიკავონ ნებისმიერი სახის პროვოკაციული ქმედებისგან, რომელიც ხელს უშლის მიხეილ სააკაშვილს მისთვის გონივრული გადაწყვეტილების მიღებაში.
ადვოკატები, ოჯახის წევრები და თავად სააკაშვილი ამტკიცებენ, რომ მას პენიტენციურ დაწესებულებაში სათანადოდ არ მკურნალობენ და ის სიკვდილ-სიცოცხლის ზღვარზეა, ამიტომ ექს-პრეზიდენტს საზღვარგარეთ მკურნალობა სჭირდება.
ყველა ახალი ამბავი
0