ფეხბურთი: საქართველოს ახალგაზრდულმა ნაკრებმა გორში ესტონეთის ნაკრები დაამარცხა

© Georgian Football Federationსაქართველოს ახალგაზრდული ნაკრების ფეხბურთელები
საქართველოს ახალგაზრდული ნაკრების ფეხბურთელები - Sputnik საქართველო, 1920, 29.03.2022
გამოწერა
Yandex newsTelegram
საქართველოს ნაკრებმა წაუგებელი სერია ოთხ მატჩამდე გაზარდა, საიდანაც სამი მოგებულია.
თბილისი, 29 მარტი – Sputnik. საქართველოს 21-წლამდელთა ნაკრებმა (U-21) წელს პირველი მატჩი ჩაატარა და გორში, თენგიზ ბურჯანაძის სახელობის სტადიონზე ესტონეთის ახალგაზრდული ნაკრები დიდი ანგარიშით დაამარცხა - 4:1.
რამაზ სვანაძის გუნდს ანგარიშის გახსნის არაერთი შანსი ჰქონდა, მაგრამ ეს მხოლოდ 34-ე წუთზე მოახერხა - თბილისის „დინამოს“ ნახევარმცველმა გიორგი მოისწრაფიშვილმა ეფექტურად და ზუსტად შეასრულა პენალტი და საქართველოს ახალგაზრდული ნაკრები ასე დააწინაურა - 1:0.
საქართველოს ნაკრები მეორე ტაიმში დიდ უპირატესობას ფლობდა ბურთის კონტროლის მხრივ, მაგრამ შემდეგი გოლი მხოლოდ 55-ე წუთზე გავიდა. იმავე მოისწრაფიშვილმა ალექსანდრე კალანდაძის შესანიშნავი პასით ისარგებლა და დუბლი გააფორმა.
75-ე წუთზე ესტონელებმა სხვაობა შეამცირეს. მასპინძლის კარში გოლი ალექს ტამმა გაიტანა. 86-ე წუთზე სტუმრებს 10 მოთამაშე დარჩათ – მთავარმა მსაჯმა მოედნიდან ნიკიტა კომისაროვი გააძევა.
კიდევ ორი გოლი მსაჯის მიერ დამატებულ დროში გავიდა. ჯერ მეტოქის მცველის შეცდომით ისარგებლა ბექა დარცმელიამ, ხოლო საბოლოო ანგარიში შოთა შეყილაძემ დააფიქსირა, რომელიც მოედანზე გოლის გატანამდე ერთი წუთით ადრე გავიდა.
რამაზ სვანაძის გუნდმა წაუგებელი სერია 4 შეხვედრამდე გაზარდა, აქედან სამი მოიგო. შეგახსენებთ, რომ 2023 წელს საქართველო რუმინეთთან ერთად ევროპის ახალგაზრდულ ჩემპიონატს უმასპინძლებს და 21-წლამდელთა ნაკრები ფინალურ ეტაპზე ავტომატურად ხვდება.
ყველა ახალი ამბავი
0