კრიპტოვალუტა და ნარკოტიკებით ვაჭრობა: ეუთოს ორგანიზებით პროკურატურაში შეხვედრა გაიმართა

© photo: Sputnikსაქართველოს პროკურატურა
საქართველოს პროკურატურა - Sputnik საქართველო, 1920, 18.03.2022
გამოწერა
Yandex newsTelegram
ნარკოტიკებით ვაჭრობისა და ფულის გათეთრების წინააღმდეგ ბრძოლა უწყების პრიორიტეტული მიმართულებებია.
თბილისი, 18 მარტი — Sputnik. საქართველოს პროკურატურაში ონლაინ შეხვედრა გაიმართა გაეროს წევრი ქვეყნების კომპეტენტური უწყებების წარმომადგენლებთან, სადაც განიხილეს ნარკოტიკებით ვაჭრობაში და ფულის გათეთრებაში კრიპტოვალუტის გამოყენებასთან დაკავშირებული რისკები და გამოწვევები, ნათქვამია პროკურატურის მიერ გავრცელებულ ინფორმაციაში.
საქართველოს პროკურატურის თანამშრომლები მონაწილეობდნენ ეუთოს (OSCE) და გაეროს ნარკოტრაფიკის, იარაღის, ორგანიზებული დანაშაულის, ადამიანებით ვაჭრობისა და საერთაშორისო ტერორიზმის წინააღმდეგ ბრძოლის განყოფილების (UNODC) მიერ ორგანიზებულ ონლაინ ღონისძიებაში.
შეხვედრის თემა იყო ,,კრიპტოვალუტის რეგულირება და შესაძლებლობების გაზრდა ეუთოს რეგიონში ონლაინ ნარკოტიკებით უკანონო ვაჭრობის წინააღმდეგ ბრძოლის სფეროში“.
საქართველოს პროკურატურის თანამშრომლებმა შეხვედრის მონაწილეებს აღნიშნულ თემასთან კავშირში რამდენიმე სისხლის სამართლის საქმეზე ინფორმაცია მიაწოდეს.

„ნარკოტიკებით ვაჭრობისა და ფულის გათეთრების წინააღმდეგ ბრძოლა საქართველოს პროკურატურის პრიორიტეტულ მიმართულებებს წარმოადგენს“, – ნათქვამია საქართველოს პროკურატურის მიერ გავრცელებულ ინფორმაციაში.

უწყების ცნობით, განსაკუთრებული ყურადღება ეთმობა გამომძიებლებისა და პროკურორების სპეციალიზაციას დანაშაულებრივი საქმიანობის პროცესში კრიპტოვალუტის გამოვლენის და შემდგომი ჩამორთმევის მიმართულებით.
მათი ინფორმაციით, პარტნიორი ორგანიზაციების დახმარებით საქართველოს პროკურატურა აქტიურად ახორციელებს გამომძიებლებისა და პროკურორების გადამზადებას. უახლოეს მომავალში კი კრიპტოვალუტის აღმოჩენისა და დაყადაღების საკითხებზე სპეციალური სახელმძღვანელო დოკუმენტის გამოცემა იგეგმება.
ყველა ახალი ამბავი
0