ევროპის ჩემპიონატი რაგბიში: ბორჯღალოსნებმა რუმინეთი დაამარცხეს

© Facebook / Georgian Rugbyრაგბი: საქართველო-რუმინეთი
რაგბი: საქართველო-რუმინეთი - Sputnik საქართველო, 1920, 13.03.2022
გამოწერა
ქართული გუნდი კიდევ ერთხელ, მე-15-ჯერ გახდა ანთიმოზ ივერიელის თასის მფლობელი, რომელიც ტრადიციულად თამაშდება ამ ორ გუნდს შორის მატჩებზე.
თბილისი, 13 მარტი – Sputnik. საქართველოს მორაგბეთა ნაკრები 2022 წლის ევროპის ჩემპიონატის მეოთხე ტურის მატჩში გასვლაზე რუმინეთს მოუგო.
ბუქარესტში გამართული შეხვედრა ქართველების სასარგებლოდ ანგარიშით 23:26 დასრულდა. რუმინეთზე გამარჯვებით ქართული გუნდი კიდევ ერთხელ, მე-15-ჯერ გახდა ანთიმოზ ივერიელის თასის მფლობელი, რომელიც ტრადიციულად თამაშდება ამ ორ გუნდს შორის მატჩებზე.
მატჩის პირველმა წუთებმა თანაბარი უპირატესობით ჩაიარა. მე-11 წუთზე ვასილ ლობჟანიძემ შესანიშნავი ლელო გაიტანა და ნაკრებს პირველი ქულები მოუტანა.
გაშვებული ლელოს შემდეგ რუმინელები გამოცოცხლდნენ და მალევე (მე-19 და 22-ე წუთებზე) ორი საჯარიმო დარტყმა ზუსტად შეასრულეს და სხვაობა მინიმუმამდე შეამცირეს - 6:7.
სიტუაცია მას შემდეგ გართულდა, რაც არბიტრმა ფრანგულ „მონპელიეში" მოთამაშე გელა აფრასიძე გააძევა. რუმინელებს გაუჩნდათ შანსი, თამაში თავიანთ სასარგებლოდ დაესრულებინათ. მაგრამ მასპინძლების შეცდომების, თედო აბჟანდაძისა და გუნდის კაპიტნის მერაბ შარიქაძის თავდადებული თამაშის წყალობით, მატჩი ბორჯღალოსნების გამარჯვებით დასრულდა.
საქართველოს ნაკრები აგრძელებს ევროპის ჩემპიონატის ლიდერობას, გარდა ამისა, ბორჯღალოსნებმა 2023 წლის მსოფლიო ჩემპიონატის ნანატრი საგზური ვადაზე ადრე მოიპოვეს.
2021 და 2022 წლების ევროპის ჩემპიონატები რაგბიში ასევე წარმოადგენენ შესარჩევ ტურნირებს 2023 წლის მსოფლიო ჩემპიონატისთვის საფრანგეთში. პირველ ორ პოზიციაზე მოხვედრილი გუნდები ავტომატურად მიიღებენ კვალიფიკაციას მსოფლიო ჩემპიონატზე. მესამე ადგილზე გასული გუნდი მსოფლიო ჩემპიონატზე მოსახვედრად ბრძოლას რეპეშიჟიდან გააგრძელებს.
ყველა ახალი ამბავი
0