ვეფხისტყაოსანი, ქართული კალიგრაფია და მწერლობა - საქართველოს პავილიონი Expo Dubai 2020-ზე

© press-service of Ministry of Economy and DevelopmentEXPO 2020 DUBAI - საქართველოს პავილიონი
EXPO 2020 DUBAI - საქართველოს პავილიონი
 - Sputnik საქართველო, 1920, 22.01.2022
გამოწერა
Expo Dubai 2020 ექვსი თვის განმავლობაში მასპინძლობს საქართველოს პავილიონს, სადაც სხვადასხვა ღონისძიებები იმართება
თბილისი, 22 იანვარი– Sputnik. დუბაიში მიმდინარე Expo Dubai 2020-ის ფარგლებში, 23 იანვარს ქართული ლიტერატურისა და დამწერლობისადმი მიძღვნილი ღონისძიებების სერია იმართება, იუწყება საქართველოს ეკონომიკისა და მდგრადი განვითარების სამინისტრო.
ღონისძიებები, რომლებიც სააგენტოს „აწარმოე საქართველოში“ ინიციატივით, თბილისის მერიის მხარდაჭერითა და „თბილისი - წიგნის მსოფლიო დედაქალაქის“ ორგანიზებით ტარდება, ითვალისწინებს მსოფლიო გამოფენის სტუმრებისთვის თანამედროვე ქართულ ლიტერატურაში მიმდინარე პროცესების, უნიკალური დამწერლობის თავისებურებებისა და ზოგადად, ქართული კულტურის გაცნობას.
ლიტერატურული პროგრამის ერთ-ერთი მნიშვნელოვანი ნაწილი იქნება მოხსენება „ვეფხისტყაოსნის“ შესახებ. არაბისტი ნინო სურმავა თემას შოთა რუსთაველის ტექსტში არაბთა სახეების გარჩევით გაშლის.
ადგილობრივი გამომცემლებისა და სხვა დაინტერესებული პირებისთვის გაიმართება არაბულად თარგმნილი წიგნების პრეზენტაცია და შეხვედრა მათ ავტორებთან - დათო ტურაშვილთან და დათო გორგილაძესთან. დათო გორგილაძე და მისი წიგნის, „ღმერთი სამსახურშია“ არაბული თარგმანის ეგვიპტელი გამომცემელი ისაუბრებენ გამოცემაზე, მისი თარგმნის თავისებურებებსა და საგამომცემლო პროცესზე. დათო ტურაშვილი საზოგადოებას თანამედროვე ქართულ ლიტერატურასა და მის ისტორიას გააცნობს.
საქართველოს ხელნაწერთა ეროვნული ცენტრის თანამონაწილეობით მოეწყობა ქართული კალიგრაფიის კუთხე, სადაც ნებისმიერი მსურველი შეძლებს სამუშაო პროცესში ჩართვას. დაგეგმილია საზედაო ასოების შექმნის, კერამიკაზე წერის, კაწვრის ტექნოლოგიისა და სხვა მარტივი ტექნიკების მასტერკლასების ჩატარება.
საქართველოს პავილიონის სტუმრები ასევე იხილავენ თეატრალიზებულ წარმოდგენას, რომელიც ქართულ ლიტერატურასა და კულტურის ისტორიას მითოსიდან თანამედროვე მწერლობამდე აერთიანებს. წარმოდგენის დამდგმელი ქორეოგრაფია ნათია ჩიკვაიძე, კომპოზიტორი - ანუკა ჩხეიძე, დამდგმელი მხატვარი - უტა ბექაია, რეჟისორი - პაატა ციკოლია.
Expo Dubai 2020 ექვსი თვის განმავლობაში მასპინძლობს საქართველოს პავილიონს, სადაც იმართება ღონისძიებები ქართული კულტურის, სპორტის, კულინარიის, ტურიზმისა და სხვა მიმართულებით.
ყველა ახალი ამბავი
0