„ჩემი დაიკო 20 წლის გახდებოდა“ – ჯანეტ ქერდიყოშვილის პირადი ტრაგედიის დეტალები
14:05 22.11.2021 (განახლებულია: 19:49 22.11.2021)
© Facebook / Janet Kerdikoshvili
გამოწერა
მშვენიერი ჯანეტ ქერდიყოშვილის ცხოვრებაში წარმატებებსა და ბედნიერ დღეებთან ერთად ერთი ტრაგიკული ამბავიცაა – 2011 წელს, როდესაც ის „მის საქართველო“ გახდა, ტრაგიკულად დაიღუპა მისი უმცროსი და - 9 წლის ანეტა.
ჯანეტი ამ თემაზე არ საუბრობს, თუმცა 2011 წელს ჟურნალ „გზისთვის“ მიცემულ ინტერვიუში ვრცლად ისაუბრა ამ თემაზე და ის დღეც გაიხსენა, როდესაც ტრაგედია მოხდა. გთავაზობთ ამონარიდს ამ ინტერვიუდან:
„მის საქართველოს“ კონკურსში გამარჯვებიდან მესამე დღეს ჩემს ოჯახს ჟურნალისტების მთელი არმია შემოესია. გაიგეს, რომ რუსეთის მოქალაქე ვიყავი და კომენტარს გვთხოვდნენ ამ თემასთან დაკავშირებით. ჩემს პატარა დას ვაფრთხილებდით - ფანჯარასთან არ მისულიყო, კარი არავისთვის გაეღო. მესამე დღეს მე და დედა ქალაქში გავედით, ანეტასთან კი ჩემი ძმა დარჩა. თურმე ის მაღაზიაში ტკბილეულის საყიდლად ჩასულა, ამ დროს კარზე ვიღაცას ზარი დაურეკავს და ანეტას ფანჯარაში გადაუხედავს, რომ ძმისთვის დაეძახა, მაგრამ, როგორც ჩანს, წონასწორობა დაკარგა და გადმოვარდა“.
მოდელის თქმით, ანეტა დედმამიშვილებს შორის ყველაზე პატარა იყო და ძალიან ანებივრებდნენ. მისი თქმით, ჭორი, თითქოს ანეტა შეზღუდული შესაძლებლობის მქონე იყო და ბავშვის მარტო დატოვება არ შეიძლებოდა, სიმართლეს არ შეესაბამება.
„ეს აბსურდია. ანეტა ერთ-ერთ ქართულ სკოლაში დადიოდა. ალბათ ჭორი იმიტომ გავრცელდა, რომ ქართულად ლაპარაკი უჭირდა", – ამბობს მოდელი.
დღეს გოგონა 20 წლის გახდებოდა. სწორედ ამ დღესთან დაკავშირებით ჯანეტმა „ფეისბუქზე“ მისი ფოტოები გამოაქვეყნა და გაიხსენა პატარა და, რომელიც მისი ოჯახის დიდ და მოუშუშებელ ტკივილად იქცა.
