კობახიძე: „ნაცმოძრაობას“ მხარს უჭერს უცხოელი ლობისტების მცირე ჯგუფი
22:10 13.11.2021 (განახლებულია: 22:13 13.11.2021)
© photo: Sputnik / Stringer
გამოწერა
მმართველ პარტიაში კიდევ ერთხელ აღნიშნეს, რომ მიხეილ სააკაშვილმა სასჯელი სრულად უნდა მოიხადოს
თბილისი, 13 ნოემბერი - Sputnik. საქართველოს უცხოელი პარტნიორების უმრავლესობა აღიარებს ექს-პრეზიდენტი მიხეილ სააკაშვილის დაკავების სამართლიანობას, ხოლო მის გათავისუფლებას უცხოელი ლობისტების მცირერიცხოვანი ჯგუფი მოითხოვს, ნათქვამია მმართველი პარტიის თავმჯდომარე ირაკლი კობახიძის წერილში, რომელიც მის Facebook-გვერდზე გამოქვეყნდა.
სააკაშვილმა საქართველოს სახელმწიფო საზღვარი უკანონოდ გადმოკვეთა და ის 1 ოქტომბერს თბილისში დააკავეს. მას სისხლის სამართლის ორ საქმეზე ექვსი წლით პატიმრობა აქვს მისჯილი. კიდევ სამი საქმე, მათ შორის საზღვრის უკანონო გადმოკვეთა, სასამართლოში განიხილება. ექს-პრეზიდენტის დაკავებამ საქართველოს უცხოელ პარტნიორებში განსხვავებული რეაქცია გამოიწვია.
„ჩვენი უცხოელი პარტნიორების უდიდესი უმრავლესობა სათანადოდ აფასებს საქართველოში მიმდინარე მოვლენებს და აქვს ობიექტური დამოკიდებულება, ერთი მხრივ, საქართველოს სახელმწიფოებრიობისა და ქვეყნის ხელისუფლების, ხოლო, მეორე მხრივ, მიხეილ სააკაშვილისა და „ნაციონალური მოძრაობის“ მიმართ. მათი უმრავლესობა აღიარებს, რომ მიხეილ სააკაშვილი სამართლიანად იხდის მისთვის შეფარდებულ სასჯელს“, - ნათქვამია წერილში.
მისი განცხადებით, ხელისუფლება აფასებს უცხოელი პარტნიორების კრიტიკას, ისინი კი მიწოდებული ინფორმაციის საფუძველზე თავიანთ პოზიციებს ხშირად ცვლიან.
„ჩვენს მიერ მიწოდებული ინფორმაციის საფუძველზე, ჩვენს პარტნიორებს, საქართველოს ნამდვილ მეგობრებს, ხშირად შეუცვლიათ თავდაპირველი პოზიცია, რაც მათ გულწრფელობას ადასტურებს. თუმცა, არიან მცირერიცხოვანი უცხოელი პოლიტიკოსები, რომლებიც ჯიუტად არ ცვლიან პოზიციას და „ნაციონალური მოძრაობის“ ლობისტობას ყოველგვარი არგუმენტაციის გარეშე სწორხაზოვნად განაგრძობენ“, - ხაზგასმულია წერილში.
მან ასევე საქართველოს პოლიტიკური სისტემის მთავარი პრობლემა დაასახელა.
„ქართული პოლიტიკური სისტემის ერთ-ერთი უმთავრესი პრობლემაა მართლმსაჯულების პოლიტიზების გამუდმებული მცდელობა, რომელშიც ოპოზიციის რადიკალურ ნაწილთან და მასთან დაკავშირებულ პარტიულ მედიასაშუალებებთან თუ არასამთავრობო ორგანიზაციებთან ერთად, სამწუხაროდ, ჩართული არიან რადიკალური ოპოზიციის უცხოელი ლობისტებიც, რომელთა ნაწილი პოლიტიკური სტატუსის მატარებელია“, - ნათქვამია წერილში.
I was refused to visit Michael Saakashvili in prison. I regret the lack of good will &transparency on the side of gvt. of Georgia &reiterate that there still is a chance of solving this situation. Gvt. of Georgia is fully responsible for life and health of the former president.
— Anna Fotyga Biuro Poselskie (@AnnaFotyga_PE) November 13, 2021
კობახიძემ აღნიშნა, რომ მართლმსაჯულების პოლიტიზების ყველაზე ნათელი გამოვლინება იყო 2021 წელს ნიკა მელიას, გიგი უგულავას და გიორგი რურუას გათავისუფლება.
რაც შეეხება სააკაშვილს, მან სრულად უნდა მოიხადოს სასჯელი, დასასრულს დასძინა მან.
სააკაშვილი, რომელმაც შიმშილობა 44 დღის წინ გამოაცხადა, ორშაბათს გლდანის ციხის საავადმყოფოში გადაიყვანეს. თავად ყოფილი პრეზიდენტი ამის წინააღმდეგი იყო. ის, მისი ადვოკატები და პირადი ექიმი მის მრავალპროფილურ სამოქალაქო საავადმყოფოში გადაყვანას მოითხოვდნენ.
ყოფილი პრეზიდენტი თავს პოლიტპატიმრად მიიჩნევს, მის წინააღმდეგ აღძრულ საქმეებს – გაყალბებულად.
