https://sputnik-georgia.com/20210905/saqartvelos-istoria-marabdis-brzola-259328136.html

ქართველთა ავი ბედისწერა სახელად მარაბდა: ამბავი გაუგონარი თავგანწირვისა

ქართველთა ავი ბედისწერა სახელად მარაბდა: ამბავი გაუგონარი თავგანწირვისა

Sputnik საქართველო

და როცა სასტიკ ბრძოლაში ცხრა ვაჟი და ერთი ქალი დაკარგა, ხერხეულიძეთა პირგამეხებულმა დედამ აღმართა ქართველთა უკვდავების სიმბოლო - დიდგორსა და ბასიანში გამოვლილი... 05.09.2021-ს, Sputnik საქართველო

2021-09-05T16:17+0400

2021-09-05T16:17+0400

2021-09-05T16:17+0400

წასაკითხი ამბები

საქართველოს ისტორიიდან

ეს საინტერესოა

https://cdnn1.img.sputnik-georgia.com/img/24385/72/243857237_0:158:1920:1238_1920x0_80_0_0_1b553e1bc579e7599d4769473c9b95d7.jpg

ქართველთა ტრაგიკულ ბედისწერათა შორის პირველობა ხორეზმის მმართველ ჯალალ ად-დინს მივაკუთვნე, რადგან მან დაუდო სათავე ქართული სახელმწიფოებრიობის რღვევას, მან დაასუსტა მანამდე აზიის უმძლავრესი ქვეყანა — საქართველო. ამას მოჰყვა თემურ-ლენგის წარღვნასავით მოვლენილი გაუთავებელი ლაშქრობები და პატარა საქართველომ ვეღარ გაუძლო, დაიშალა და დაქუცმაცდა.მიუხედავად ამისა ბრძოლა არ შეუწყვეტია, რაღაც მანქანებით გადარჩენა მოახერხა და ფეხზეც წამოიწია — როგორც გაირკვა, დროებით.1625 წელს ქართველთა მოსისხლე მტერმა, ირანის მბრძანებელმა აბას პირველმა 50 000 მეომარი წარმოგზავნა საქართველოში მარტყოფის მარცხზე შურის საძიებლად. მეფე თეიმურაზ პირველმა და გიორგი სააკაძემ 20 000 მეომარს მოუყარეს თავი და კოჯორი-ტაბახმელის მიდამოებში დაბანაკდნენ.სამხედრო თათბირზე სააკაძე მოითხოვდა, ჯარი მანამ არ დაეძრათ, სანამ მტერი თავად არ გადმოვიდოდა შეტევაზე. ასეთ შემთხვევაში კოჯორი-ტაბახმელის ვიწრო ხევებიან მიდამოებში ირანელთა ლაშქარს გაშლისა და რიცხობრივი უპირატესობის გამოყენების საშუალება არ მიეცემოდა. გარდა ამისა, ზაფხულის ხვატში მარაბდის დაბლობზე ბრძოლა მეტად გაუჭირდებოდათ ქართველთა ქვეით ჯარს. სამხედრო თათბირმა სააკაძის გეგმა არ მოიწონა და არც მიიღო. მთავარსარდლობა თავად მეფე თეიმურაზმა იტვირთა და ბრძოლის თარიღად მომდევნო დღე — 1625 წლის 1 ივლისი დათქვა. გიორგი სააკაძე კი სულაც ჩამოაშორეს ბრძოლის საერთო ხელმძღვანელობას.ინათა და ქართველებიც გადავიდნენ შეტევაზე. როგორც ჩანს, ირანელთა სარდლობა ამას ელოდა და მომზადებულებიც დახვდნენ იერიშს. მეწინავე რჩეულ ცხენოსანთა რაზმს სანგრებში ჩამსხდარმა ყიზილბაშებმა ცეცხლი დაახვედრეს. თუმცა, შეტევა კი შეაფერხეს, მაგრამ ვერ უკუაგდეს ქართველები, რომლებიც ქარიშხალივით შეიჭრნენ მტრის ბანაკში და მათი მეწინავე რაზმები გადათელეს. ხოლო ირანელ მეწინავეთა სარდალი ამირგუნა-ხანი სასიკვდილოდ დაჭრეს.მემატიანე ფარსადან გორგიჯანიძე გვამცნობს, ბრძოლის ველზე ისეთი ხმაური იდგა მეომართა ყიჟინისგან, თოფებისა და ზარბაზნების ქუხილისგან, რომ სპარსელთა ბანაკში შეშინებულმა აქლემებმა აიწყვიტეს და თავრიზამდე ირბინესო.თავზარდაცემული მტერი შედრკა და გაქცევა დაიწყო. ქართველთა გამარჯვება გარდაუვალი ჩანდა და ალბათ, ასეც იქნებოდა, რომ არა...ქართველთა ჯარის ერთმა ნაწილმა ბრძოლა მოგებულად ჩათვალა, ხმლის ქნევას თავი მიანება და ალაფობას მიჰყო ხელი. ამასობაში მტერს დამხმარე ძალა მიემატა, ირანელმა სარდლებმა ჯარი გადააწყვეს და თამამად შემოუტიეს უკვე არეულ ქართველთა რიგებს. ამას დაემატა საბედისწერო გაუგებრობაც: მარაბდის ბრძოლაში დაეცა თეიმურაზ მუხრან-ბატონი, ქართველთა შორის კი სწრაფად გავრცელდა ხმა, თითქოს მეფე თეიმურაზი მოეკლა მტერს.და ჩვენს მხედრობას სასოწარკვეთა დაეუფლა: მეფის სიკვდილი ხომ ომის დასასრულს ნიშნავდა?! გვიანღა მიხვდნენ ქართველები თავიანთ საბედისწერო შეცდომას...სისხლისღვრა მზის ჩასვლამდე გაგრძელდა. ბრძოლითა და სიცხით არაქათგამოცლილი ქართველობა უკანასკნელ ამოსუნთქვამდე ეჭიდებოდა რიცხვით მრავალ მტერს, მაგრამ უშედეგოდ. ალიონზე დაწყებული ბრძოლა გვიან ღამით დამთავრდა ქართველთა მარცხით. თუმცა ამ წაგებულ ომშიც კი ბრძოლის ველზე, დაცემული 9 ათასი ქართველის საპირწონედ, 14 ათასი ყიზილბაში დარჩა! მარაბდამ შეიწირა ბევრი გმირი მამულიშვილი: შვიდი ძმა ჩოლოყაშვილი, ცხრა ძმა მაჩაბელი, ცხრა ძმა ხერხეულიძე... საქართველოს ეკლესიამ წმიდანებად შერაცხა რწმენისა და სამშობლოსთვის თავდადებული მამულიშვილები.მარაბდის საბედისწერო ომმა ისევ დააშორიშორა მცირე ხნით გაერთიანებული ქართლ-კახეთი. ქვეყნის ფეხზე წამოდგომასა და წელში გამართვას მთელი ასწლეული დასჭირდა, სანამ კიდევ ერთი დიდებული გმირი არ იშვა.მაგრამ წინ კიდევ ერთი ავი ბედისწერა ელოდა საქართველოს — ბედისწერა სახელად კრწანისი...

https://sputnik-georgia.com/20210829/saqartvelos-istoria-jalaledinis-semoswva-bolnisis-brzola-258888226.html

https://sputnik-georgia.com/20200818/giorgi-saakaZe-alepos-ngreva-didi-mouravis-sikvdili-249234314.html

https://sputnik-georgia.com/20200808/martyofis-brZola-249163889.html

https://sputnik-georgia.com/20190513/dasjili-erTguleba-ambavi-baaka-zerzeuliZisa-245218510.html

2021

ახალი ამბები

ka_KA

წასაკითხი ამბები, საქართველოს ისტორიიდან , ეს საინტერესოა