თბილისი, 22 ივნისი − Sputnik. აშშ-ის იმედები ჩრდილოეთ კორეასთან დიალოგის აღდგენაზე ფუჭია და კიდევ მეტ იმედგაცრუებას მოიტანს, განაცხადა ქვეყნის ლიდერის კიმ ჩენ ინის დამ, კორეის შრომის პარტიის ცკ-ის განყოფილების ხელმძღვანელის მოადგილემ კიმ იო ჩჟონმა.
მისი კომენტარი ჩრდილოეთ კორეის ცენტრალურმა სატელეგრაფო სააგენტომ გამოაქვეყნა.
„გავრცელდა ინფორმაცია, რომ აშშ-ის პრეზიდენტის მრჩეველმა ეროვნული უშიშროების საკითხებში [ჯეიკ სალივანმა] ჩვენ მიერ პარტიის ცენტრალური კომიტეტის პლენუმზე გამოთქმული პოზიცია აშშ-ის მიმართ „საინტერესო სიგნალად“ შეაფასა. კორეული ანდაზა ღაღადებს, რომ ყველაფერი ინტერპრეტაციაზეა დამოკიდებული. აშშ, როგორც ჩანს, [ჩვენს პოზიციას] ისე განმარტავს, რომ თავი დაიმშვიდოს. დამოუკიდებლად მიღებული ფუჭი მოლოდინები მათ კიდევ მეტ იმედგაცრუებას უქადის“, − განაცხადა კიმ იო ჩჟონმა.
როგორც მანამდე გახდა ცნობილი, ქვეყნის ლიდერის დამ ცკ-ის პლენუმზე განაცხადა, რომ ფხენიანი მზად უნდა იყოს აშშ-თან როგორც დიალოგის, ისე კონფრონტაციისთვის. სამხრეთ კორეამ ამ მომენტს „გარდამტეხი“ უწოდა და იმედი გამოთქვა, რომ აშშ-სა და ჩრდილოეთ კორეას შორის დიალოგი სწრაფად აღდგება. აშშ-ის სპეციალურმა წარმომადგენელმა ჩრდილოეთ კორეის საკითხებში სონ კიმმა, სამხრეთ კორეელ კოლეგასთან ნო გიუ დოკთან გამართული მოლაპარაკებების შემდეგ აღნიშნა, რომ ვაშინგტონი უახლოეს დღეებში ელოდება ფხენიანისგან დადებით პასუხს დიალოგის აღდგენის შეთავაზებაზე.
