თბილისი, 17 ივნისი — Sputnik. საქართველოს მთავრობამ გააფართოვა იმ ქვეყნების ჩამონათვალი, რომელთა მოქალაქეებს საქართველოში ჩამოსვლა ვაქცინაციის გარეშე, მაგრამ უარყოფითი PCR-ტესტით შეუძლიათ.
მთავრობის განკარგულებით, ამ ქვეყნების სიაში მოხვდნენ სან-მარინო, მონაკო, სერბეთი, ისლანდია, ლიხტენშტაინი, მონტენეგრო, ანდორა, ჩრდილოეთ მაკედონია და ბოსნია და ჰერცეგოვინა.
ამ ქვეყნების მოქალაქეებს, ასევე ამავე ქვეყნების ბინადრობის (ცხოვრების) უფლების მქონე პირებს საქართველოში ჩამოსვლა შეუძლიათ ჩამოსვლამდე 72 საათით ადრე გაკეთებული PCR-ტესტის უარყოფითი შედეგით.
შემდგომში ჩამოსვლიდან მესამე დღეს მათ განმეორებითი PCR-ტესტის გაკეთება საკუთარი ხარჯით მოუწევთ.
მანამდე ეს წესები ვრცელდებოდა შემდეგ ქვეყნებზე: ევროკავშირის წევრი სახელმწიფოები, ისრაელის სახელმწიფო, თურქეთის რესპუბლიკა, შვეიცარიის კონფედერაცია, ნორვეგიის სამეფო, ამერიკის შეერთებული შტატები, დიდი ბრიტანეთისა და ჩრდილოეთ ირლანდიის გაერთიანებული სამეფო, საუდის არაბეთის სამეფო, კატარის სახელმწიფო, არაბთა გაერთიანებული საამიროები, ბაჰრეინის სამეფო, სომხეთის რესპუბლიკა, აზერბაიჯანის რესპუბლიკა, უკრაინა, ყაზახეთის რესპუბლიკა, რუსეთის ფედერაცია, ბელარუსის რესპუბლიკა, თურქმენეთი, უზბეკეთის რესპუბლიკა, ტაჯიკეთის რესპუბლიკა, ყირგიზეთის რესპუბლიკა, იაპონია, კანადა, ქუვეითი, ჩინეთი, სამხრეთ კორეა, მოლდოვა, ომანი.
აგრეთვე საქართველოში ჩამოსვლა შეუძლიათ ყველა აცრილ უცხოელებს (გამონაკლისს წარმოადგენენ ბოლო ორი კვირის განმავლობაში ინდოეთში ნამყოფი ადამიანები).
ყველა უცხოელ ვიზიტორს საქართველოში შემოსვლისას უნდა ჰქონდეს სამედიცინო დაზღვევა, რომელიც საჭიროების შემთხვევაში კორონავირუსის სამკურნალო ხარჯებს დაფარავს.
