თბილისი, 1 ივნისი – Sputnik. საქართველოს მთავრობამ მოხსნა შეზღუდვა პროგრამის „დანერგე მომავალი“ დაფინანსების არეალზე, რომელიც მიმართულია სასოფლო–სამეურნეო მიწების მიზნობრივი გამოყენებისკენ ბაღების გაშენების გზით, ნათქვამია ქვეყნის სოფლის მეურნეობის სამინისტროს განცხადებაში.
პროექტი „დანერგე მომავალი“, რომელიც 2015 წლიდან ხორციელდება, სახელმწიფო პროგრამა „შეღავათიანი აგროკრედიტის“ შემადგენელი ნაწილია და სახელმწიფოს მხრიდან ხეხილის ბაღების განახლება-გაშენებისთვის ფერმერების მიერ ნერგების შეძენის დაფინანსებას ითვალისწინებს.
პროექტის მიზანია საქართველოს ყველა მუნიციპალიტეტში (თბილისის, რუსთავის, ბათუმისა და ფოთის გარდა) სასოფლო–სამეურნეო მიწების მიზნობრივი გამოყენების მაქსიმალურად ხელშეწყობა მრავალწლოვანი კულტურების გაშენებისა და სანერგე მეურნეობის მოწყობის გზით.
პროგრამამ „დანერგე მომავალი“ შექმნა კონკურენტუნარიანი და თანამედროვე მეურნეობები. პროგრამის დაწყებიდან დღემდე მრავალწლიანი ბაღები გაშენდა 10,5 ათას ჰექტარზე მეტ ფართობზე.
პროექტის ფარგლებში სახელმწიფოს თანადაფინანსების მოცულობა შეადგენდა: ხეხილის ბაღების გაშენების შემთხვევაში ნერგების ღირებულების 70%-ს და წვეთოვანი სარწყავი სისტემის მოწყობის შემთხვევაში – 50%-ს; სანერგე მეურნეობის შექმნის შემთხვევაში – მეურნეობის ღირებულების 50%-ის დაფინანსებას.
მთავრობამ ცვლილებები სახელმწიფო პროგრამაში „დანერგე მომავალი“ ორშაბათის სხდომაზე დაამტკიცა. შესწორებების თანახმად, სახელმწიფოს თანადაფინანსების მიღება ხეხილის ბაღების გაშენებაზე სასოფლო–სამეურნეო მიწებზე მთელ ქვეყანაშია შესაძლებელი.
პროგრამაში ცვლილებებით დაზუსტდა სეტყვის საწინააღმდეგო სისტემების ან/და ჭის/ჭაბურღილის/წვეთოვანი სარწყავი სისტემის მოწყობის დასაფინანსებელი ჰექტრებისა და თანადაფინანსების მოცულობა.
ფიზიკურ და იურიდიულ პირებს დაუფინანსდებათ ვაშლის, მსხლისა და ბლის ბაღებისთვის განკუთვნილი სეტყვის საწინააღმდეგო სისტემების მოწყობის ღირებულების არაუმეტეს 10%-ისა, ხოლო სასოფლო-სამეურნეო სტატუსის მქონე კოოპერატივების, გამყოფი ხაზის მიმდებარე სოფლებისა და მაღალმთიანი დასახლებების შემთხვევაში – არაუმეტეს 20%-ისა.
სეტყვის საწინააღმდეგო სისტემების შემთხვევაში დაფინანსდება არაუმეტეს 50 ჰექტრის მოწყობა. ჭის/ჭაბურღილის (მათ შორის, სატუმბი სადგურის) მოწყობის შემთხვევაში კი თანადაფინანსება მოხდება ღირებულების არაუმეტეს 50%-ისა (ერთ ბენეფიციარზე არაუმეტეს 15 ათასი ლარისა), ხოლო სასოფლო-სამეურნეო სტატუსის მქონე კოოპერატივების, გამყოფი ხაზის მიმდებარე სოფლებისა და მაღალმთიანი დასახლებების შემთხვევაში − არაუმეტეს 60%-ისა (ერთ ბენეფიციარზე არაუმეტეს 18 ათასი ლარისა).
