თბილისი, 23 მაისი – Sputnik. უცხოეთში მცხოვრები საქართველოს მოქალაქეები 24 მაისიდან ID-ბარათის და ბიომეტრიული პასპორტის აღებისას იუსტიციის სამინისტროს სპეციალური წინადადებით ისარგებლებენ.
24 მაისიდან 7 ივნისის ჩათვლით პერიოდში საქართველოს მოქალაქეები რესპუბლიკის დიპლომატიურ წარმომადგენლობებსა და საკონსულოებში ID-ბარათის აღებას უფასოდ შეძლებენ, ხოლო ბიომეტრიული პასპორტის - 50%-იანი ფასდაკლებით.
ელექტრონული ID-ბარათები უფასოდ გაიცემა იმ მოქალაქეებზე, რომლებიც ერთ-ერთ შემდეგ პირობას აკმაყოფილებენ:
- არასდროს არ ჰქონიათ საქართველოს მოქალაქის პირადობის დამადასტურებელი მოწმობა (პირველადი დოკუმენტის გაცემა);
- აქვთ ძველი ნიმუშის პირადობის მოწმობა (თუნდაც მოქმედი);
- მათ სახელზე გაცემული ელექტრონული ID-ბარათი ვადაგასულია ან მისი მოქმედების ვადა 2021 წლის 7 ივნისამდე იწურება.
ბიომეტრიულ პასპორტს 50%-იანი ფასდაკლებით მიიღებს საქართველოს ის მოქალაქე, რომელიც ერთ-ერთ შემდეგ პირობას აკმაყოფილებს:
- არასდროს არ ჰქონია საქართველოს მოქალაქის ბიომეტრიული პასპორტი;
- აქვს არაბიომეტრიული პასპორტი (თუნდაც მოქმედი);
- მის სახელზე გაცემული ელექტრონული ბიომეტრიული პასპორტი ვადაგასულია ან მისი მოქმედების ვადა 2021 წლის 7 ივნისამდე იწურება.
