თბილისი, 21 მაისი – Sputnik. საბერძნეთში, ატიკის რეგიონში სახლების ქურდობის ბრალდებით საქართველოს ექვსი მოქალაქე, მათ შორის ორი ქალი დააკავეს. ამის შესახებ ინფორმაციას ბერძნული მედია ავრცელებს.
ადგილობრივი პოლიციის ინფორმაციით, ამ დროისათვის გამოძიებულია ქურდობის 18 შემთხვევა, მოპარული ნივთების საერთო ღირებულება კი 190 ათას ევროს აჭარბებს.
დაკავებულების ჩხრეკისას ამოღებულია დიდი რაოდენობით საიუველირო ნაკეთობები, საათები, ბრენდირებული ტყავის ნაწარმი, ძვირადღირებული ტექნიკა (კომპიუტერები და ტელეფონები), თანხა, ავტომობილები და სხვ.
საბერძნეთის სამართალდამცველმა უწყებამ უკვე გაავრცელა ოფიციალური განცხადება, სადაც ნაჩვენებია მძარცველების ფოტოები და ასევე ნაქურდალი ნივთები. ორგანიზებული დაჯგუფების შესახებ გამოძიება გრძელდება.
გავრცელებული ინფორმაციით, დაკავებულთა დიდი ნაწილი თელავიდანაა.
საქართველოს საგარეო საქმეთა სამინისტროს განცხადებით, საბერძნეთში საქართველოს საკონსულოში ამ დროისათვის საბერძნეთში დაკავებული ქართველების შესახებ ოფიციალური ინფორმაცია ჯერ არ შესულა.
